Appam - Soura

Jun 30 – A Tanakudan ayam-lingan banabyen!

“Aman d’ong-hen hanang-Nam batte apsuigodtih, do tanakud ayam lingan Aman d’ong-hen anabgugun batte jatih” (Sanenken 73:24).

Ateng ayam, atanakudan boi boi bangsa susunan saring. Ordardage agnugun a hangdrangan batte ruangdage a ganugu a hangdrangan objungle adraptibe. Ordardage anabsittan saring ruangandage anabsittan surdadam.

Kitungan abanabyen amben ampara dakute atanakudan sikoija do abtangortaben. Jisun gamle: “o itente Hen baihtaben, anta kuddub bernan aninji a manneben asan hanghangbaji. Bar gijba, kan a ordaran ayaman a tanakkudan sikkoi ja tordong ayam amben ampara Hen dakutenai” (Mattiu 28:20).

Anin jzbjzble dile ayam amben ampara dakute, atanakudan ayam janang. Erahidan a mandrengna, Anin radudam d’ongben ablute a tanakudan sikoija.

Ateng kan ordar-lingan atanakudan abmele kuditenji. Asui dirna, banantongan pangtai. J’e-lingan kanalkalan, yangam a mandrengnanji atakudte, aninji ruangandage adarakuna hangteji orde itja.

Bibolan gamte bangsale: “Butente gudinglaben, Anin demadage na, bar ianang Anin antate lumte” (1 Tesalaniki 5:24). Anin boi boi radudam atanakudan sikoija.

Anlen kinoltabe Bibol-lingan: “Anelai-abduran a purban Jisun kan a ordaran saring a Uan amangban Hen a yerten a ardual yerrai, gamle galamle, ordar lingan a mandradamanji a d’ong timyiman timyimle, a tanakudan sikkoi ja aninji a d’ong timyimeten” (Jon 13:1).

Akaridadong Kitungan d’ong-ben abanabye maran gamle, do atanakudan sikoija tanditaben, Anin absittataben nami saring atanakudan sikoija do banangsa baranji batte sanabyun tiyle sayamtaben do darditaben.

Tanahimdam Kitungan a onagji, Kitungan amangba surpidnaben dete, Anin batte asuyeman ahangben asan. Do Kitungan babyetaben do darditaben.

Okiy Kinolbe absele: “Iten asan gamlenden anlen mangan a parjanji na, do tette saring Ablu Mar Gamangtung Jisu Kristun a daiyaman abmele anlen omdetabe” (Pillipi 3:20).

Leave A Comment

Your Comment
All comments are held for moderation.