Appam - Soura

Jun 20 – Asang ayam-lingan banabyen!

“Anin aninji a d’ong gameten, Noyomi (manan jabung), gamle adhimdongih, bindo Mara (manan, asang), gamle adhimihba. Iten asan gamlenden Barij Ranaptidam Kitungan boi boi asang karamman abme-ihten” (Rut 1:20).

Mandrengna-lingan anasangan atabben dete, eteden mandrengna boiboi abasudate do er bangsan pangtai.

Bibol-lingan, anlen kinoltabe Noyomi a mandrengna ling asangan abmele. Anin Betlehem saring yirre Moab a disaban iyeten dakune, bar kuti-lingan a tanongba kadhidle do bagu a onanji ja. Juarboige, juarboijan ayamling ateng asang dinanji dakule dile dinna.

Angante anin yernaiten Israelban, aboina saattan akoinan dakule. Angante amainanji saileji, anin gamle danukka batte: “Hen tedne saring barijdam dean dele yerre bindo Gamangtungan abrikkale abyarihten. Do Gamangtungan bogad hen apsele asanggemle oblengetenden, bar barij Ranaptidam Kitungan bogad d’ong-hen abkalkalihtenden, iten asan gamlenden amben Noyomi, gamle a gudingtih” (Rut 1:21).

Kun ambrij, Esun a mandrengna janang barij asang dakule. Angante janoldan dele a buhangan batte, anasangan batte anin erdainan dele, anin absidle anabsittanji a U’an amang saring, apardi-onge. Anin edalen arasudan do anasangan batte, bar gamle a u’aan amangba, “E uang, hen aa d’ong janang absitta-ih!” (Aparamantan 27:34). Kan anasngan janoldan adelen a buhangan batte ate.

Misoranji janang Israelanji a d’ong asangdage apanadradan tiyleji, boantan ambrij, kan ambrij (Hanagod 1:14). Pitor edale asangdamge, iten asan gaamlenden anin Kitungan a d’ong adjajad, a d’ongan ateng timyimle (Luk 22:62).

Bar, anangte Israelanji ardulaiji Maraban, aninji d’an gale adraptiadji Maran saring, gamlenden aninji anasang-lingan dakuleji. Bindo Kitungan absuile boa ran, anasangan abandaben abmele. Angante kun aran ganadlun dele d’a-lingan, kun d’an ragal dele.

Angnte Anin kun a dinan adgalamad, Jisun, kun aran batte bandale anasangan saring ranagalan. Angante amben ajate mandrengna-ling-ben, Anin kuddub amdungte do er sanabyunji do anasanganji do pangtai ragal mandrengna.

Tanahimdam Kitungan a onagji, Maran anasangan, mandrengna-ling-ben, dile ayam adakune do bayale s’idte. Bibolan gamte: “Anten saring aninji Elim, ahim darakunaaban arduleji bar kotten miggal dungdamnadan do yakurdi-galji sindi neban dakule. Ante saring aninji kun adam-d’aban abtulenji” (Hanagod 15:27).

Okiy Kinolbe absele: “Aninji Baka tamlung bassengan padle yerrenjiden aninji antate dungdamdan a darakunan abmeteji; abmang ganuran batte janang kanate abhalidate” (Sanenken 84:6).

Leave A Comment

Your Comment
All comments are held for moderation.