Jul 15 – Kitungan a j’en Anogandin a Mandran!

“Jissi a on Daudo a d’ong Hen hanglai. Anin j’e-Hen a anogandin ambrij abo mandran na. Anin barij itsum-Hen abojoraite” (Anappai 13:22).

Daudo timhimle Kitungan a itsuman, do Kitungan batte ahanaben abmele oskailen do Kitungan atanamhiman barij adeben asan. Name saring agupaneten adnang saring, anin dile ayam Kitungan a d’ong gudingle dakuneten a rajaman ahangben asan, engale anlen gijtabe. Kun asan Daudo a mandrengna anabdainan dele.

Angante anin dangarda dakule, Daudo a buhanganji batte anansan dele. Deleja a d’ongan anab-Dainan dele do anabgugun dele, iten asan gamlenden Kitungan a itsuman dakule. Itente a bernan oblingle banabye-beran Goliath amangba adakule adnang, a tanimyiman do a itsuman Kitungan . Daudo gamle: “Kan er ganadrerdeb Pilisti bai buten do anin Am’eng Kitungan a sanu maranji a d’ong badeberre pudyingte?” (1 Samuel 17:26).

Goliath amangba anin janang gamle raduloge: “bindo hen asanggem-ling-nam kuduai kuduaianji a GAMANGtung do Israel a sanu maranji a Kitung, ayengan a Kitungan a d’ong aman pudyingte, Anin ahim lingan hen mangba-nam yertai” (1 Samuel 17:45). Anten asan Daudo dainan hangle Pilistian amanganji saring. Kitungan d’ong-ben abdainate, do tirrid-taben, angante amben Kitungan a d’ong itsumtaben, a d’ong batte atanangte do oskaidam adete a berna-lingan. Do d’ong-ben ganaroijan ade-e.

Anab-bagu-lingan, Daudo danelen Kitungan a banuddi-lingan. Bibolan gamte: “Angante Kitungan saring kun er marid janggardan mang-ling-nam yertai, seletten kun mandran anin binaraijan raijte do aman barokij bangsa detam” (1 Samuel 16:18). Butente uyubte anin raduloge sanu-lingan dainan hangte gamle ganalaman dete kuddub a bara-lingan tiydamnan batte. Anin dainamar dakulebarij banuddin batte kuddub bara-lingan. Angante anin Sol adarakuna-lingan, Jonaton baile banuddin batte a baran Daudo a d’ong, do anin aboi gardimar deleji. Tanahimdam Kitungan a onagji, angante Kitungan amben batte, amben janang anuyuban ahangte do dainan batte.

Anab-yagi-lingan, Daudo barij tanimyiman Kitungan abmele. Bibolan barijloge gadlamlangten anosaijan do banai-beranji dile ayaman, Daudo barij surpiddamnan batte tiydamlen. Sanenken Daudo butente idolle anabsittanji abmele mandran amangba tiydamnan togal tamba Kitungan anosaijan, do anabsittan hangte.

Tanahimdam Kitungan a onagji, angante amben Kitungan a d’ongan atimyimte Jisun Kristun barij j’en batte, barij pwrardan batte, do barij monnan batte, d’ongben anabdainan dete. Kitungan Jisun anabsittamaran. Kitungan ranadun mandrengna-ling-ben do abantongdong (Sanenken 27:1).

Okiy Kinolbe absele: “Danggarda maran anin a pwrardan yan gamle marid dakkute? Banaihber-Namji a manannen batte” (Sanenken 119:9).