JULY 03 – Agete par hoishe!

Genesis 33:3 Jakob taikhan sob laga agete jaise aru tai jitya tai laga kokai laga usorte ahise titia tai matha niche kori kene sat Baar mati ke chuishe.

Itu te ami khan pore bole pai ki Jacob laga jibon te ki hoise. Jacob aru Esau tu judwa bhai thakishe. Esau tu shikari thakishe aru Jacob tu ghor te thaka chokra thakishe. Jacob tu chalak kuri kena tai bhai Esau laga jonom hok aru ashirbad tu sob loiloishe. Itu laga bhoi para ki Esau tu tai ke Morai dibo tai tu ghor para polai jaishe.

Bishi saal jaishe, aru tai duijon tu lok napai. Itu pichete Jacob tu shadi kuri maiki khan aru 13 ta bacha bi thakishe. Tai tu bishi dhon thakishe hoile tai laga bhai Esau laga bhoi para hi mori thakishe.

Ekta homoi ahishe jitya Jacob tu Esau ke lok koribole lage, tai piche hoi jaishe. Tai tu tai laga naukar, ghor te pala janwar, maiki bacha Khan sob ke agete jabole dishe aru tai nijor pichete. Itu homoi te tai bhoi khai kena isor ke yaad kurishe. Aru tai prathana kuribo shuru hoishe. Tai isor laga morom aru shakti nimite rukhishe. Tai mon khuli kene prathana kurishe, “oh isor moi baba Abraham aru Isaac laga, ami tu mulio (worth) nohoi apuni laga morom aru hoilebi ami itu paar kuri ase ami laga manu Khan logote, itya mi khan duita bhag hoishe, bachai lobi amike ami laga dada laga hath para. Ami khan itu genesis 32:9-11 te dikhi pai.

Itu prathana tu ani thakanai. Itu ekta bhal prathana thakishe. Tai isor ke lok pailoi she itu prathana para. Itu pichete tai tu age ahishe sob ke par hoikena. Ami khan Genesis 33:3 te dikhi pai Jacob tai Khan sob laga agete jaishe aru tai jitya tai laga kokai laga usorte ahishe titya tai matha niche kori kene sat Baar matike chuishe..

Hoi itu prathana para hi taike tagot dishe. Aji bhapna kuribo laga pobitro kotha tu hoile Psalms 18:29  ase