June 25 – Amben a Ganudingan Gijba!

“Iten asan gamleden e buhanganji, amben a ganudingan gijba, yante gamle a tam d’ongan ambrij ateng banuddi maranji, ateng ranapti maranji, ateng surda jatti maranji ganudingan adhangadji. Bindo ordar lingan itente kekadage antate Kitungan sedaleten, yante gamle Anin banuddi maranji a d’ong rapti gabroite” (1 Korintia 1:26,27).

Kitungan tanimyiman batte asedabentenan ate Ogandile giyja, yang a ganugu manglingben do yang a bangsa aganudigan. Kitungan aman ampara daku kanin-na ate murdam. Anin aman ampara daku anten asan aman murda-dage abara lumben dete. Agante Kitungan aman ampara dakuten, yang abanuddi marnji amangan saring aman? Bibolan gamte, “Kristu Jisun, ayegan a d’ong banuddi-len, ranoitad-len do manaridan do tanadun delabe” (1 Korintia 1:30).

Agante Kitungan Mojes a d’ong’on sedale, anin anindaman abmele gameten, “Hen lesaber mar do adji-adlang mar na.” Bindo, Kitungan ranaptidam Israel maranji a d’ong rable do tagorle bakudi minum sikoija Mojes batte.

Agante Kitungan Jirimiya a d’ong gudingle, amben a galamtepo anin yangam ayerbereten? Anin gamete, “Hen bernan a berben asan aggalamai iten asan gamlenden hen bo passij mar maih daku.” Bindo Kitungan Jirimiya a d’ong birna a to’odlingan teaten, bo surda tumadgiymar abmele do ranaptidage hangramle.

Pitoron er galam-mar do ham-yomar dakule Kitungan agudingle adnang. Agante Kitungan gudingle, anin gamete, “Manghen saring yira, iten asan gamlenden hen bo pintu mar, e Kitung”. Bindo Kitungan a hanangna mar abmele, janggardan batte absittale do bo surda anappaimar abmele. Jon Wesley, ayegan a mandra metodis a ranukuling ranabagang dele, anin jatadam dakule do bigdranji amang saring managan dele. Bindo Kitungan  ranaptidage hangramle.

Bo surda maran Dwight Lyman Moody er galam dakule do mandranji ateng a d’ongan mahang leji English biran aerganoihan batte. Bindo, abara batte ateng mandranji anabsittan deleji. Nami janang, a himlingan baradete Kristu a purba birna ambrij.

Tanahimdam Kitungan a onagji, amben janang d’onglingan er tuolangji dakute agale kan surda maranji aman dakule. Janggardan-dage amarangben asan amben ateng anegoi birnanji amdangte. Amben agaja adayergodongne. Kitungan d’ongben gudingle banuddimar abmeben asan. Ranapti hangba, rad-dudamnaba, deling do pwhangba.

Kinolbe absele: “Etteden Gamangtungan alan ijja bindo b’oban abmetaben” (Bagujuaber 28:14).