ऑगस्ट 18 – प्रार्थना ऐकणारा — आणि प्रार्थना करणारा!

“हे प्रार्थना ऐकणाऱ्या प्रभू, तुझ्याकडे सर्व माणसं येतील.” (स्तोत्र ६५:२)

आपल्या प्रभूची अनेक नावे आहेत. त्यामधील एक सुंदर आणि कोमल नाव आहे — “प्रार्थना ऐकणारा.” केवळ प्रार्थना ऐकतोच असे नाही, तर तिचं उत्तरही देतो!

प्रभूने प्रार्थनेच्या उत्तरांबद्दल किती आश्वासक वचने दिली आहेत, पाहा:

“तो मला हाक मारेल, आणि मी त्याला उत्तर देईन; मी संकटकाळी त्याच्या बरोबर असेन; त्याची सुटका करीन आणि त्याला गौरव देईन.” (स्तोत्र ९१:१५) “मी तुझा देव प्रभू आहे, जो तुला लाभ होईल असं शिकवतो, आणि तुला योग्य मार्गाने चालवतो.” (यशया ४८:१७)

“तेव्हा तू हाक मारशील आणि प्रभू उत्तर देईल; तू आक्रोश करशील आणि तो म्हणेल, ‘मी येथे आहे.’” (यशया ५८:९) “ते अजून बोलण्याच्या आत मी उत्तर देईन; ते बोलत असतानाच मी ऐकेन.” (यशया ६५:२४) “माझ्याकडे हाक मार, आणि मी तुला उत्तर देईन, आणि तुला मोठमोठ्या व अद्भुत गोष्टी दाखवीन, ज्या तुला ठाऊक नाहीत.” (यिर्मया ३३:३)

किती अद्भुत आहे हे जाणणं की, जो प्रार्थना ऐकतो, तोच स्वतःसुद्धा प्रार्थना करतो! जेव्हा येशू ख्रिस्त पृथ्वीवर होता, तेव्हा त्याने प्रार्थनेत आपलं उदाहरण आपल्यासमोर ठेवलं. त्याने आपल्या पावलांचे ठसे मागे सोडले, ज्यावर आपण चालावं. (१ पेत्र २:२१)

जे लोक प्रार्थनेसाठी आसूसलेले आणि तहानलेले असतात, त्यांच्यावर प्रभू कृपेचा आणि विनंतीचा आत्मा ओततो. (जकरया १२:१०) नंतर पवित्र आत्मा त्यांच्याबरोबर, शब्दांत व्यक्त न होणाऱ्या आर्त सुस्काऱ्यांनी मध्यस्थी करतो. (रोमकरांस ८:२६)

प्रत्येक वेळी जेव्हा तुम्ही गुडघ्यावर बसता, तेव्हा येशूचा सौम्य आवाज तुमच्या कानात पडो — “माझ्याबरोबर प्रार्थना कर.” एकटे प्रार्थना करताना तुम्ही थकू शकता. पण जेव्हा तुम्ही येशूसोबत प्रार्थना करता, तेव्हा तुमची प्रार्थना सामर्थ्यशाली बनते.

प्रभू म्हणाला: “तुम्ही एक ताससुद्धा माझ्याबरोबर जागरण करू शकला नाही? जागे रहा आणि प्रार्थना करा, म्हणजे तुम्ही प्रलोभनात पडणार नाही. आत्मा उत्सुक आहे, पण देह दुर्बल आहे.” (मत्तय २६:४०–४१)

देवाच्या प्रिय मुलांनो, जर तुमचं जीवन रूपांतरित व्हावं, आणि तुम्ही एक सामर्थ्यशाली प्रार्थनेचे योद्धे व्हावं असं वाटत असेल, तर येशूकडे पाहा. उपवास आणि प्रार्थनेत तोच आपला सर्वोत्तम आदर्श आहे.

पुढील चिंतनार्थ वचन: “म्हणून आपण धाडसाने कृपास्थानाच्या सिंहासनाजवळ जाऊ या, की आपल्याला दया मिळो आणि योग्य वेळी मदतीसाठी कृपा सापडो.” (हिब्रू ४:१६)