Sep 09 – Raja-Ontidan!

“Bindo ayengan a mandranji GAMANGtungan apsele omdeteji, aninji tabme tabme ranaptin hangteji; aninji raja-ontidan ambrij renengle lanangkaban engteji;” (Jisaiya 40:31).

Endrang engen abmang raja-ontidan, bo bangsa hanagodan saiteji. Kun ambrij, Kitungan a mandranji janang sanaisai Kitungan atimangban goble do anabtangoran aomdiben dete.

Bibolan gamte butente butente Kitungan a d’ong omditeji aninji a ranaptinji bartabme dage dete. Kitungan a nordin tiyle tanunjingan, duaihan kanalkalan do barij arasudanji, d’ongben arabduben asan. Kan ambrij, amen Kitungan amang a dirnaben dete do a surpiddamnaben dete. Do Anin angaja adkaridaben. Butente butente Kitungan a d’ong omditeji aninji man’oihdam.

Bo dirna-buhangan dakule bo surda kompani-lingan baraneten. A gamanglen atiki, Kitungan amang saring sagai yireten. Kun ayam, amandrengna-lingan bo surda kanalkalan yiraiten, do a baran janang sidle, alunuman do kudduban adanen itente amangban dakule sidle. Itente a lebun amangban dakule a sidben susule, kuddub a sidlen atiki Kitungan amangban yiraiten. Engale Kitungan ajanalang abmele omdile dakule garberan do anamnan batte. Do anin barij dele bangsa janababan batte do janggardadage a taniytiyan batte. Bo bangsa janggardadage a taniytiyanji batte do Kitungdage a ranaptin, anin anabdin dele bo surda ranaptidage Kitungan a baran do radudage baranlumle.

Itente amben name kanalkalan orde anabkalkalanji ahangte kun batte d’ongben adnabside. Kun kudduban Kitungan batte anordin dele, arengengben abdiben dete do lanankkaban aengben dete. Raja Daudo gamle: “Aman endrang padradihen abmang hen ardodgodban yerre, bindo nami hen berna-Nam mannetai” (Sanenken 119:67). U’u, Kitungan mangbaben tanunjingan appaitai a d’ong amben ahimben abmele.

Angante tarban ratte, aidbanji dakute barij gamle. Bindo angante barij gamle ratte, kun kuddub adeten batte, bo surda bangsadage, ganijgijan langadam do bo bangsadage dete.

Kitunglen Jisun tanunjingan kanalkalan batte yireten do kalobory-lingan anadaijan dele. Bindo yanarmengan dele. Do yanarmengan atagalda, Anin delen barij ganugu batte asanaruman yaryarmanengban ardueten barij ordarban.

Tanahimdam Kitungan a onagji, tangorben anabkalkalan detepo, barij kanalkalan batte? Tanunjingan do anabdusanji mandrengna-lingan, abdukkatabenpo? Garbernaba do omdiba Kitungan ajingba. Iten asan gamlenden amben a d’ong atimyimte, Anin barij baraben bangsa abmete.

Okiy Kinolbe absele: “Iten aSan gamlenden hen ogaltai do itente a ganugun anlen apsele anabpunggen dete, kun ampara nami ayama kanalkalanji abjongben asan tungna ted” (Romi 8:18).