Sep 02 – Kukkuran Basueten!

“Seletten ordaran d’an tum dakulen asan, kukkuran a j’engan a dakkuben darakunan adhiangad; kun asan engdasingban barokij anin amangban daiyaraiten” (Aparamangtan 8:9).

Bo surda kun barij d’an batte anabs’idan saring, Noa bagu ontidanji bahiraban amdungle bungsangan saring kakan do kukkuran. Kan bagu ontidanji tambigarda amandrengna baranji do alum-manjija.

Angante kakan bahiraban yirreten, endungle dakuneten d’an adnahidan sikoija ordarlingan. Kan ambrij ayingan amandranji kayatindage engdungteji kani kuni gamle. Kakan kun ambrij (Lebi 11:15).

Bindo kukkuran ate bungsangban yarnaiten, atanangben asan dam adhangad darakuna anten asan. Papwr Anosaijan ayam-ling, Marid Janggardan ordarban yiraiten. Bindo barij ordaran pintun batte barij a dakun asan, basule adrabtiad mandranji amangba. Janang, murkundarngan do jontunji kubleji, bindo mandranji admaridadji do handramdage adeben asan Marid Janggardan basueten. Kun asan Marid Janggardan mandranji amangba bsaute, Anin dile ayam abmele basule adraptiad. Anin darakuna adhangad hangdrangdage a darakuna.

Ateng kan ambrij, do Marid Janggardan gadlamlangten Jisu Kristun a karukkudan abmele, do tumadgijmaranji amang saring abpungele. Engale kukkuran bungsangan saring anamdungan adelen ambrij, oliba olan batte ayerlenaih ate, mesian abmele Marid Janggardan bangsa anoblingan oblingle. Nami janang, oliba olan bo arabmadan bangsa ganadlaman do sanabyun barij ordaran abmele.

Kan a bangsa anoblingan gupamaranji amangban gadlamle pisirdain: “Gijba, Hen bangsa anoblingan panglai itente barij ordaran abmele bangsadage”. Kristun a kurukudan bangsa anoblingan-na. kan ate anin abmele do Anin a baran abmele, kun ate anlen danetabe hirahidan anabsttan batte do bangsa anoblingan nami janang mandranji amangba gadlamteji.

Angante kukkuran anabyagi tara bungsangan saring anadpaihan dele, adyarnaiten, ordarban basueten. Kun ambrij, Tabme Anoisaijan lingan janang Marid Janggardan, ruangan a kukkuran Jisu Kristun amangban labsolai do dile ayamabmele amangban basueten. Kaninna a Marid Janggardan hananna maranji amangban labsolai pentikosto dinna ayam-lingan. Nami janang, basute barij purten a mandranji amangban Kitungan Jisun Kristu ahimling. Tanahimdam Kitungan a onagji, Marid Janggardan a dakunaben asan amben darakuna atiytepo?

Okiy Kinolbe absele: “Pitor kan bernan opungeten adnang, kan bernan amdanglen a kuddub mandranji amang lingan Marid Janggardan latsonaiten” (Anappai 10:44).