Jun 26 – Kudinan ayam-lingan banabyen!

Angante hen sintatenai do kuditenai, seletten banabye-Nam pwrarda-hen abm’oihte” (Sanenken 94:19).

Bo bangsa anobling-marn Charles India lingan yiraite alsimilinji, do barij a raanptin do a ranadun batte Kitungan abaran lumleji. Abumung, d’ongan er tu’ulan batte, karahidba ardule. A dukkarin amangba goble gijgijle engale dakunaben etigoi dakule.

Anin ogandile dakuneten Charles abmele India-lingan a dakulen adnang, do a baran Kitungan abmele dile dinna do togalan. Anin ateng dukkadale Anin Kitungan abmele tiydamlen baran alumle ate, nami anin lumle adraptie. Do atanaakud-lingan, angante anin lumle, bo dirna-buhangan amangba goble lagad j’en batte gameten Kitungan a timangba goble. Itente dele kudduban babyele a d’onganji gamle.

Kitungan baabyete, do tanimyiman batte amadanji gosotte. Anin agaja adnumdrengben danukka-lingan d’ongandamben. Itente yaryarmanengbaa engdungte, rukkuten bo manengba. Kan ate aboi arasudanted, atenganji s’idle abangsate. Do atanimyiman manglingben daakute do banabyetiyte.

Anappai Pol gmeten: “Iten asan gamlenden kuddub kanalkal-ling-len Amn babyetalen,yante gamle itente a hanabyen Kitungan batte anlen banabyen detabe, kun batte dile kanalkal lingan a deten a mandranji a d’ong rapti abbabyetabe” (2 Korintia 1:4).

Banabye tiyle, Anin bigardanji a d’ongan janang babyete. Kan sattan kanalkaln ayam-lingan abtagorle, buten buten kanalkal-linga galuteji banabyen batte abtagorte.

Ayob gamle: “Bar Anin a surda ranaptin batte hen ampara arbadete po? Ijja, bindo Anin berna-hen daludte na” (Ayob 23:6). Tanahimdam Kitungan a onagji, angante mandrengna-ling-ben yaryarmanengban erisumdage dakute, Kitungan amang adamnaba, do u’ante saring ranabraban yirtai gijgijba abdi-madlen.

“Sanaiyam-hen Gamangtungan amang saring yertai; Anin riangan do ordaran gabdelle” (Sanenken 121:2). Danukkan ayam do sintanan ayam sattang, amben Kitungan amangba ayirte. Aninna banabye Kitung, Anin kuddub amadaben gosodtte, bo rumangdage a s’in batte.

Okiy Kinolbe absele: “Rzngnaba, iten asan gamlenden nami marid dinna. Amben dukkadage a dedong” (Neemiya 8:11).