Jun 25 – Kan’rngan ayam-lingan banabyen!

“Iten asan gamlenden GAMANGtungan gamte: Hen d’ong-nam barokij absamangtai, bar Hen kan’eng-namji abbangsatai” (Jirimiya 30:17).

Jajingante a kan’enganji abgijtae do jajingante ate gijtate do kan ambrij. D’ongdage a kan’engan do pwradan a kan’engan. Jajingante a kan’engan bayale samangte jajingante ate absamganroije. Nami Kitungan mangbaben yiranyire tanimyiman batte gaamte Hen d’ong-nam barokij absamangtai, bar Hen kan’eng-namji abbangsatai do babyetaben.

Kitungan sayamlai janang, anin samangte. Pintuben asan anin panadradan tiyle, asuyeman dakuten mangling-ben sanamang tiyle kan’engben abangsate.

Angante Israel-maranji pintun lumleji, Kitungan a d’onganji pangle. Bindo angante aninji kuni-lingan arsuda aninji saile adrabtiadji do edalenji, Anin a kan’enganji absamangle abyaraiten a desabanji.

Juda kambolan, Raja kambolan do Israelanji aabmele kuddub ajardinna. Angante amben Kitungan amang a gijgijte, Anin kan’engben absamangte. Aten asan sanenken Daudo garberlen gamle: “Palang uggaran Kitungan a janaja kanuban. E Kitung, Aman palang do abyarj’e uggaran adnarde-e” (Sanenken 51:17).

Bo murda maran Jerusalen saring Jirikoban yirle, do juburmaranji batte hanaman dele, a d’ongan tadle a sindrin riddle, aparaleji, do umdrengle yireji er kadhidlabe. Sunuman na jumburmar, butente d’ong erkadhilabe umdrengte. Man’oihaben do sanabyuben, janggardadage anablun table pangte, do umdrengtabe karahidban. Bindo Kitunglen, bo bangsa Samaritan, anaparan adelen amandran a d’ong asaiben yiraite, asuyemdale aa d’ong-lingan, abdile, miholan jodle do drakiyadan tiyle do aparabalen tolbadle kan’enganji.

Tanahimdam Kitungan a onagji, Kitunglen absamangmar do sanagalmar. A tanimyiman batte kan’enganji absamangte (Luk 10:33-34). Anin galamte arasudaben do babyetaben. Kan’engben absamangte nami do bo bangsa d’ongan tiytaben.

Okiy Kinolbe absele: “Bindo mang-ling-ben bute bute ahim-Hen bantongteji, amben apsele ranoitadan a uyungan dungte, do Anin a reneng lingan sanamangan daku. bar gunggusing lingan a on-tanganji ambrij amben baiyeran dungle zrjable a m’oihte” (Malaki 4:2).