Jun 13 – Anumdrengan ayam-lingan banabyen!

“E Kitung-Hen, e Kitung-Hen Aman iten asan umdrenglih?” (Mattiu 27:46).

Itedeleja mandrengnan ayam-lingan, atamhimtaben a mandran a d’ong a karidaben boi boi jugardamdam. Dukkarin abmele yan akanalkalan, atanongba omrenglen  a inslon abmele! Orde sanna pasijanji abmele, a u’an ayanganji akahidlen do anin taangor-lingan abasutenji abmele!

Angante bo mandraan kan ambrij anin dakuten agardinji ampara akaridalenji asan, kulamanji do surda dane maranji, a j’e ateng kalkal-dete. bogad amben kan ambrij adakulenanden, amben Kitungan amangba agijgijben dete, ayengan a Kitung agaja akkaridaben.

Ateng ayam, agangte agante garberan Kitungan abnandange aparditabe. Bindo janardin kan ate: Kitungan agaja adkaridae. Daudo gamle: “Hen passij dakulih do nami hen talaibalih, dele janang hen roitad maran anumdrengan orde anin a passijanji janumjuman apsele a gargarnanji hen angaja er ganij” (Sanenken 37:25).

Gardinamji orde kulamnamji karidateji binod Kitungan Jisun adkaridae. Pwrba ayamlen Simon Pitor Kitungan amangban gijgijle do gaamle: “E Gamang, buten amangban anlen a yore? Berna-Namji er ahidan a mandrengnan a bernan na, do anlen a derrenai, bar a galamlai do, Aman anta Marid Mar, manan, am’eng Kitungan a On” (Jon 6:68-69).

Angante amben kanalkal-lingan a dakuten, Jisun kuddub abmele galamte itente mangbaben daku, Anin janang kan ambrij kanalkal tangor-lingan ahaneten asan. Kun ayam-lingan arakkadang-lingan ateng arasudanji dakule, Anin pangdamlen bo surda saangdrangle gameten U’a Kitungan amangba: “E Kitung-Hen, e Kitung-Hen Aman iten asan umdrenglih?”.

Anumdrengan del mandran battte do U’an batte, arakkadang-lingan tangangan dele do kuddub saile do danukka do ganarojan. A d’ongan ateng asudale karahidan adnang. Do a hanangna maranji a d’ong tandileji.

Ayengan amandranji amang saring anabsittan do banangsa hangleji, aninji uailoge gamleji: ‘arakkadang-lingan amdaiba gamle’. Kuddub banangsa a baranji, Anin hangle anabgadrojan do kani kuni gamle. Jisun asangda janang gale kun ayam-lingan, dile mandranji.

Anumdrengan ayam-ling babyelangten Kitungan, ajardinna gamle abdainabenten do banangsaban urungtaben. Sanenken gamte: “Ua-yang-henji d’ong-hen umdrenglihji janang den Gamangtungan d’ong-hen sagaltih” (Sanenken 27:10). Tanahimdam Kitungan a onagji, Kitungan agaja adnumdrengben, Uaa-yanganji umdrenglabenji janang.

Okiy Kinolbe absele: “Hen asui ayaman apsele maih d’ong-nam umdrenglai, bindo karran asuyeman batte Hen d’ong-ben rukkutai” (Jisaaiya 54:7).