Jul 23 – Anabmaina Maranji!

“Anabmaina maranji man’oihdam, iten asan gamlenden Kitungan a onanji, gamle panemengan hangteji” (Mattiu 5:9).

Nami ayam-ling sonuman a si-lingan daku kan ordaran, Anasangan do anasanggeman mandranji batte asan. Ateng bernanji amdangtabe kan ambrij anabkalkalan do anabasudan mandran a d’ong, bo mandran a d’ong abs’idben. Desa-lingan sananbyun agasa, engale saanutenji didargamle.

Anganle Ukaraine do Russia abmele gijtabe. Hospitalan do Schoolan anabs’idan dele do barij darakuna anabsidan. Kan ate ganaroijan aambrij abernan bo surda desanji batte kan baagu desanji sanabyun ahangben asan arberan dete. ateng desanji batte ordar-lingan, bagadden Ukraine batte orde Russian batte, nami a dinna-linganji ordaran sanid-lingan daku.

Nami ayam-lingan, bo dinnasoi sanabyun batte dakute, ersanun batte bo bigarda desan batte. Apwrban ayamlen, sanumaranji saattang sanu-lenji tiydamlen, nami ate er sanumaranji a d’ong-janan kadhidtaaji. Aninji janang tanuab maranjina, kun batte barij ordaran ganalun dete, kan ambrij. Ordar sanidban yireten bayale, ateng mandranji a d’ong kanabhidan dete kan ambrij.

Anabmaina maranji man’oihdam – tansoij orde birindalengan, orde desa-lingan. itente asanabyun Kitungan amang sring yirtai. Aninna sanabyun rajan. Do anabmaina maranji a d’ong Kitungan a oananji gamle ganaman dete.

Kitungan Jisun ordarban yiraiten mandran do Kitungan batte sanabyun atiyben. Angante Anin arakadang-lingan tanangaan dele, Anin a U’an Kitungan amangban surpiddamlen gameten, do pintu maranji abmele Anindaman tiydamlen, mandran do Kitungan baatte abmainaben. Anin a mihaman batte abaldungle itente anasanggeman dakule Kitungan do mandran batte do abmainale. A itsuman dakule ruangan do ordar sanabyun batte abmainaben, do tanimyiman atanardun apaiben.

Tanahimdam Kitungan a onagji, ambendaman surpiddamlen bo hangdradage adeben dete Tanimyiman a Kitungan a Onanji. Amben janang anabmaina mardeben dete. itente Kitungan bamainale antate abansadong. Baraben batte bo bigarda birindanji janang sanubyun do banangsa ahangben dete. dile ayam sanabyun abmeben dete. kun ambrij sattang ate banangsa mandrengna.

Okiy Kinolbe absele: “Bar anin a arakaddangan a mihama’n batte sanabyun abmean abmele kuddub janabanji Anin batte Anindam ampara abmainate, u u itente ordar lingan daku, orde ruang lingan daku, Anin batte abmainate” (Kolossi 1:20).