Jul 07 – Tai jun hi Isor laga ase!

Isaiah 43:1 “bhoi nakoribi, Ami apunike bachaishe; Ami matishe apuni ke apuni laga naam pora; apuni Ami laga ase!”

Isor mate apunike Tailaga morom pora aru koi “Apuni Ami laga ase”. Kiman bi achurit ase na apuni ke mata tu Isor pora Tai laga nijor koi kene, iman bishi manu itu prithibi te thaka khan laga majote. Itu matibo lage dangor anondo logote apuni laga mon te!

Pobitro kotha te bishi homoi ase jitya Isor mate tai laga chela khan ke Tai laga Nijor koi kene, tai khan logote khara kore aru tai khan laga phine pora kotha bi kore. Tai khara korishe Moses nimite itu koi kene: “nahoi Ami laga naukar Moses logote; tai prabhu bhakta ase ami laga pura ghor te” (Number 12:7). Tai giraishe Tai laga morom aru bordhasht nakore ituke jitya Israel manu khan Moses laga khilaf te khara kore.

Itu nishina hi Tai mate apuni ke aji, itu koi kene: “Ami laga chokra, Ami laga chokri, apuni Ami laga ase”.  Apuni Tai laga ase jinika Tai apuni ke bonaishe aru kilekoile Tai kinishe apuni ke tai laga kimti khun pora. Aru kilekoile apuni pora Tai ke dishe apuni laga pura mon, apuni Tai laga ase.

Isor David ke bi Tai laga nijor mate. Tai saishe imandari David laga, judi bi tai bhera ke charwaha kora laga manu thakishe koile bi. Isor por tai laga nomrota aru aru morom hi saishe, aru bhuk aru pyas Isor nimite tai laga mon te thaka hi saishe. Aru Tai gawahi dishe David laga, itu koi kene: “ Ami bisari paishe David chokra Jesse laga, ekta manu Ami laga mon nishina, jun pora Ami laga sob icha pura koribo” (Acts 13:22). Judi apuni Isor laga ase, hosabi Isor pora apuni laga gawahi dibo.

Isor pora ekta dangor gawahi dishe Tai laga naukar laga kotha Job laga Satan ke. “titiya Isor pora Satan ke koishe, “ki apuni bhabna korishe Ami laga naukar ke, ki tai nishina kun bi nai itu prithibi te, ekta dagi nathaka aru sidha manu, ekta jun hi bhoi kore Isor ke aru biya ke khedai?” (Job 1:8). Apuni tu dhon ase Isor laga aru jun apuni ke chui, tai chui Isor laga suku laga morom ke.

Song of Solomon te, Isor pora mate Tai laga dulhan khan ke. Tai mate dulhan ke bishi morom laga kotha te jinika ‘ami laga morom’, ‘ami laga kopou’, ‘sobse bhal’. Aru Isor jun hi mate ami khan ke Tai laga nijor, ami khan uporte mauhar lagaishe tai laga dangor naam laga. Tai bachai she ami khan ke Tai laga kimti khun pora. Aru chunishe ami khan ke chuni loa laga tel pora, juntu ami khan ke bhorta kore.

Isor laga bacha khan, apuni isor laga ase? Dikhabi nijor ke Isor laga ase itu koi kene: “Ami laga morom Isor, Apuni ami laga ase, ami Apuni laga aru Apuni laga hi ase. Ami di ase nijor ke apuni ke khushi  koribole, aru dibole ami laga pura morom apuni ke?

Aji bhabna koribole laga pobitro kotha tu hoile  Psalm 23:1 “Isor hi ami laga charvaha ase; ami iku nalage”.