JULY 05 – Tangsoijan abmele Rojoldele!

Tangsoijan abmele Rojoldele!

“Engale Hen Mojes ampara dakulenai, attele Hen aman ampara dakutenai. Bar Hen d’ong-nam anga janang adnumdrengam orde adnomda-am” (Josua 1:5).

Kuddub rumang ajanabanji Kitungan tiyante, Anin anlen ampara a dakutenan na ate murda-dam. Ejaja ragal do ranaptidam ted Anin atanudu ambrij. Jisu Kristun ordarba yirrai mangling-len a dakunaben asan. Bibolan gamte, Anin a tanudu. Jisu Kristun ordarba yirrai mangling-len ganugu dage a dakunaben asan. “Bar gijba, kan a ordaran ayaman a tanakkudan sikkoi ja tordong ayam amben ampara Hen dakutenai” (Mattiu 28:20). Kan ate gamete, anin tordong ayam anlen ampara dakute.

Bo buhang Brahmin a kuttaling saring Anin ateng kanalkalan saring Jisun adongrablen batte anin Jisu Kristun ad’ong jae-ten ablumar-hen gamle. Bo denna as’in maranji ual-leji d’ongling-Nam butte sanaisai, anlen orde Jisu Kristun. Sanabyem batte ayerbirle gamete, ‘Jisu Kristu’. Okiy aninji ual-leji biti do kuddub saisajanji sanaisaited po, anin gamete Jisu Kristun sattan sanaisai hen abmele. Kan ate agante as’inhin maranji amdangleji, anin asindrin rile do tudle sidle amdunleji.

Agante kun buhangan haling yirle tagorlingan, Jisu Kristun asangran bangsale amdangle. Jisu Kristun ad’ongan gamete, “O’on, Hen d’ong-nam adnadkunra-am”. Bo Kitungan atanudu kun buhangan batte yeryermanegba dakule.

Kun ayam, Kitungan Gideon ad’ong gamete, “E uywb do ranapti mar, Gamangtungan aman ampara daku” (Bitsara 6:12). Pisirdian Mari ad’ong gamete, “E asuyem handrang boi! Gamangtungan aman amparadakuten” (Luk 1:28). Kitungan Mojes ad’ong gijgijle gamete, “Hen butente Hen na” (Hanagod 3:14). Kuni a Kitung abandane do ranapti batte abayimlangte. Anten asan radudam do kuddub kanudingji gonle do bangsa mandrengna lingan dakunaba. Kitungan ganugu hangte mangben saring.

Raja Daudo anindaman galamete Kitungan anin ampara daku. Anin radudamling gametehen ogaja adyire iten asan gamlenden Kitungan hen ampara daku. kun ate anin galamete, Kitungan gupamar agaja adnumdrenglan-ne, kun ate manoihling gamete, “Oo, Hen karahid lungudage a tamlung lingan halenai janang, iteja kanalkal delih ja hen abbantongai; iten asan gamlenden Aman hen ampara daku; Aman a ranjamdangan do Aman a tanurdidangan d’ong-hen babyetih” (Sanenken 23:4) do ranadun hangle. Kitungan atanakudan sikoija Daudo ampara dakule tagorle do kun ambrij, Anin amben ampara dakute.

Kinolbe absele: “Bar aninji yeran yerre kuddub lingan oblengleji. Do Gamangtungan aninji ampara turdule baraeten. Bar a sandunglen arabmadanji batte Anin kun a bernan a janardin apsuijeten” (Mark 16:20).