JULY 04 – Salem a raja!

“Bar Salem a raja Melkijedek ….. Anin kuddub saring Lanangka Kitungan a buyan” (Aparamangtan 14:18).

Tinne a giytaben abirna Melkijedek abmele. Anin Salem a raja dakule do Anin kuddub saring Lanangka Kitungan a buyan dakule. Anin janababan a delen a raja.

Kun sattan ted. Agante Abraam anabsitta ling, anlen gijtabe anin janangan bo jananbab ambrij a tumadgiymar a lanakalingan dakule. Kan yagi a jananbaban Kitungan a pasijanji tiyete. Bogad Kitungan a on’anji dane abmele yangben asan, aninji janababan deben dete raja amang saring. Bogad aninji radu janabablingan dakunaben asan itsumteji, murda buyan do tumadgiybiran aninji abmele sanaisai.

Anlen Kitung-len gudintabe Abraamanji a Kitung, Issak a Kitung do Jakub a Kitung. Abraam aboi Kitungan a tumadgij-mar dakule. Kitungan anindaman Abimelek ad’ong gamete Abraam aboi tumadgij-mar. Issak aboi murda buyan ambrij. Tinne Jisun Kristun aramadan gijtabe, Issak kanuban ambrij panagang adeleate. Jakub aboi raja a dane ambrij aramadan dele Kitungan batte ‘Isarel’ gamle ayegan a birna raja.

Tame anosaijan yagi bananten dele. Aboi lingan Bangsa Anoblengan, anab bagu lingan Anappai maranji a lanumanji do anab yagi lingan Anabpunggeberan. Bangsa anoblengbirlingan Anin aboi tumadgiymar ambrij gijtale, Anappai maranji a lanumanji lingan Anin murda buyanji ambrij ganiytadele do Anabpunggeberana lingan Anin Rajanji a Raja ambrij ganiytadele.

Ruban, nami bar tarda ayam Jisu Kristun sarigoi dakuten. Ruban Anin Tumadgiymar dakule, nami Anin murda Buyan ayegan a bidsaralangtenan amandra do Anin na Rajanji a Raja tarda ayam dakute.

Anabpungge 1:8, anlen kinoltabe giytabe, ‘Ayengan a Gamang Kitungan nami daku, abmangan dakule do tiki yertai’. Anin tumadgiymar dakule, Anin buyan do Anin Rajanji a Raja ambrij yertai. Oo. Anin abojoraite a baran kan yagi tagoran ambrij tumadgiymar, buyan, Rajanji a Raja.

Jon 4:19, kun inslon Jisu Kristun a d’ong bo tumadgiymar ambrij giyle. Anin gamete, “E Uang, Aman bo tungm’adgij mar”. Ebri 9:11, anlen giytabe Jisu Kristun aboi a gugu Buyan. 1 Jon 1:7, anlen giyle raptetabe Anin na Amaridlanting. 1 Korintia 15:25, anlen giytabe Anin aboi dane mar. Tanahimdam Kitungan a onagji, tarda ayam ayemba Anin d’ong-ben jabable sedabenten aboi Raja, Murda Buyan do Tungm’adgij mar.

Kinolbe absele: “…Iten asan gamlenden buyanji amang saring anosaijan, orde galam maranji amang saring ganalaman, orde tungmadgij maranji amang saring tungmadgijbiran san’zdan adde-e” (Jirimiya 18:18).