June 27 – Nami Aggalame – Tiki Galamte!

“Itente Hen lumtai, antate nami aman aggalame, bindo kan a tiki aman galamte” (Jon 13:7).

Bogad amben Kitungan a bara a galamben a itsumlenden, janggardan amohod dakuben dete kun ambrij luhudan arirideben dete.

Bo denna, abumung pastron kahidle. Anin murdam a mandra do kitung tanimyimling dakule. Abumung ugaran a rasuda dele. A dukarin do a passijangji ateng dukadaleji do hedalingji. Aninji hedaling gamleji, ‘iten do kitungan kan ambrij lumeten mangle? Iten asan ualen anin pageten?’ do kun ambrij.

Jajingante adenna a tiki. Bo denna, a dukarin do a passijangji hedaling a kulamanji amangba hedungle, abumung ganugu panalidang dele. A kahidling a buhang do ateng pisidianji ampara ate ganiytan dele. Ategoi a mahang do ategoi amuka do ategoi aganiygiy manahagan batte anin gamle a dukarin do a passijangji a d’ong, “Iten asan amben a hedaten? Kitungan a d’ong senba. Abguguba. Kitungan bangsadam do anin anablu tadaayam dakuten.” A tiki, pisidianji yirleji anin janang yireten. Kan a rumang bara a mandrengnaji badaneten. Aninji sanabyem yangleji. Aninji kitungan a d’ong abguguleji do senkenraleji.

Anappai pol idolle, “Bindo e buhanganji, kzndumdalen a mandranji abmele yante gamle amben er galamge a dete, antate itsum-len ted, yante gamle danerder tedan a bzgarda maranji ambrij amben maledage adde-e. iten asan gamlenden Jisun kahidle do barokij dzneten, antate bogad anlen a derrenaienden, ettegoi na Jisun batte a kzndumlen a mandranji a d’ong Kitungan Jisun ampara urungtai” (1 Tessalonikia 4:13,14). Karahidan a tanakud ted bindo kan ate aboi luluna. Kitunglen hanarmeng do mandrengna. Anin, amang butente dirten kahidle ja harmengte (Jon 11:25).

Kan ate aman a jadirna galamben dete hanangan do kitungan anosaijbiran bibolingan karahidan abmele. Karahidan, oder kinorahang oder tarurmudung Jisun Kristu a d’ong dangle a raptied. Judaji do Romiyonji a sanumaranji tolbale a raptiedji a tarurmudung oder a d’ong janangan. Jisun Kristun yarmengle. Amben ja yararmenglingan dirdirnaba.

Tanahimdam Kitungan a onagji, a bumung tanagadang yirtai; kanalkanal ja yirtai. Ugarben ahedatinan adnag Kitungan anualbir iten, iten kan ate Kitungan lumepo? Anin a birna “Itente Hen lumtai, antate nami aman aggalame, bindo kan a tiki aman galamte”.

Kinolbe absele: “Bar bute bute Kitungan a d’ong timyimteji, bute bute Anin a tam aparamangta ganabrin ambrij ganudngan deleji, Kitungan kuddub lingan aninji a banagsan abmete, antate anlen a galam” (Romi 8:28).