June 24 – Bo Bangsa Surpidamna – Rad-dudamna!

“Daniel raja-janumjumanji do drakyadan batte anindaman er marid abmedanaben asan a j’e lingan adnitsumad” (Daniel 1:8).

Surpidamna do Rad-dudamna kristu mandrengna lingan ateng murdadam. A rad-dudamne sikoija, a marid mandrengna rabrable a raptie. Bogad surpidamna a dakulenden kanalkalan ayam monna kanurkuran dete.

Nami, anlen giyle raptitabe bigda bigda sanipdaybiran do rad-dudamnabiranji. Bute bute ate jelun ajumai gamle sidaybirtenji, bute bute ainsloji ate aboblinganji tarban atangalnai do bibolan kinolle tagaldan do dennalingan garbiling dakkutenai gamle sidaybirtenji. Ajadirnna, kan ate bangsa. Sanipdeybiran, delenden, abojoraiben dete (Hanangber 5:5).

Ayegang amngdra dennalinganji ayimte, anin Kitungan a d’ong ayimte. Bindo rad-dudamna do surpidamna todorng ayam dakuben dete do asuidenna ted apsele. Jaru surpidamna mandreng madta sikoija dakuben dete eteden marid mandrengna yanagan dete.

Papwr Anosaijlingan, Kitungan surpidamna a mandrengna a pasijangji a d’ong tietenji. Kun surpidamna a mandrengna Najiranji asanideybir apsele. Danisam kambo’ollingan, 6:1-12 a robjongbiran kuddub giyleraptitabe Najiranji apsele. (1) Kuddub dennalingan a sidaybiranji ambrij sanurpidan asan a lanangkalinganji kanalkalan ayirai. (2) Anin drakyadan saring do kuddub ganaganji saring sagaidakunaben dete. (3) Anin kun batte karahidan a dea. Kan a surpdamna asui denna apseleted, bindo mandrengmadtan sikoija.

Tabme Anosaijlingan, Jisun Kristun a mandrengna surpidamna a jaru ugarle gatrle. D’ongle marid lingan adakuben asan, anin damang surpidamling Kitungan aisum abojoraeten. Anin gamle kan ate kun apsele, Anin ruangan saring latsolai (Jon 6:38). Anin dulaidale bakudi denna anamneten adnang. Bindo, anin dulaijang batte arengan rutipun abmele adjumad.

Saitan a d’ongan gudingle gamle tungjigeten. Oo. Amandrengna aboi surpidamlen marid gamle adakulen asan. Anin maridam, ejaja adongan adjabe, adnarie do pintun saring anasan dage (Ebri 7:26).

Iten Kitungan saite mangben saring ejajated bindo surpidamna do rad-dudamna mandrengna lingan. Papwr Anosaijlingan, Daniel a surpidamna amandrengna, yang Kitungan a d’ongan abdile! Kitungan Daniel amangba a sosobiranji abgiytale. Tanahimdam Kitungan a onagji, ambendaman surpidamle a hanadamtenpo!

Kinolbe absele: “Anin gamte, Ayengan a mandranji kanuban batte hen ampara anoisaijan gabrileji, kun derna mar-Henji a d’ong mangba-Hen rukkuba” (Sanenken 50:5).