Appam - Soura

June 22 – Tanamsenglingan Murdadam!

“Tanimyim mar-hen tamsengdam do radudam; galji ajar lingan anin murdadam” (Solomon a kanen 5:10).

Buten bute amandranji Jisun Kristu amangba banudi biran gamle yirtaji. Amangba, a hangna mar deteji. Aninji kan ambrij anin amangba, absuidamlen. Aninji abgugulen gamteji, “Tanimyim mar-hen tamsengdam do radudam; galji ajar lingan anin murdadam.”

Anin paludam, Bibolan palu Kukajalem taran arobjongan Anin batte dele. Kukajalem taran agale da’ahba palu gamle dakuten kun ambrij, Jisun Kristu manaridan do lanagadan batte mangbale dakute.

Anin janangan je’edam. Je’e agaramgaman Kitungan akarupkuban aramad do kalobory amiham. Kan kudduban na ate tanimyiman, je’e mihaman kalobaory a baruling lale, anlen apsele. Anin amangan langan do bangsa tagorang adakued. Agante je’e coloran giytabe, Kristu a kanalkalan do a kubdamnete ate galamtabe anlen apsele, ugarlinglen anin manoh’oigan barij tadangge dele.

Anlen giytabe bibolingan Kitungan batte arobjongan adele ate, Kukajalen taran do anin a je’e mihaman kalobari a baru saring a birna. Kan ambrij arobjongan dele je’e gulapi taran. Agante je’e gulapi taran giytabe, mihaman ambrij a je’e aboi aboi ajatadling amihaman kalobari abaru saring, ugarlen yuryurten. Anin Kitungan A Onan. Anin mandran a Onan. Anin na sanayam marlen, Kitungan amangba agobgob daku.

Giygiyba anablu marlen. Anin palu do Marid, galji a jaranji saring mudradam. Anin anlen ate. Agante d’ongben asilingan a surpile, anin ambin apsele dele. Yang a bangsa sanittabir Kitunglen oblinghaiten, “Ruangan raja-garobgob-Hen bar ordaran haradwb-perda-Hen” (Jisaya 66:1) anin anlen ate do a sayamlangtenang a Kitung!

Tanahimdam Kitungan a onagji, Amben bogad anablumarhen gamle jale agale pwraradannam a timyimten ambrij, Anin ugarlingan dakute. Anin manglennam ganugu pangtai. Anin manglingnam janggardadage a tanimyiman do manaridan pangtai. galji ajar lingan anin murdadam do d’ongben anin mudadam abmete.

Kinolbe absele: “Bar Kitung-gangkilan a r’uberan boiboi gugudam, gamle kuddubanji abpengbateji. Kitungan, d’ong lingan panunggen dele, Janggarda lingan, roitad, gamle panemengan dele, ruang pisirdianji batte gittale, bzgarda jatti maranji amang lingan anoblengan dele, ordar lingan mandranji batte Anin derderan dele, ganugu panemengban Anin anamdaijan dele” (1 Timoti 3:16).

Leave A Comment

Your Comment
All comments are held for moderation.