Mar 30 – Utu maiki jun tai laga ghor bonai!

Proverbs 14:1 “gyani maiki tai laga ghor bonai, hoilebi budhi nathaka niche te girai tai laga hath pora.

Ekta gyani maiki hobo lage tai laga ghor ke shanti pora chola bole nimite. Inika maiki hi zaroori ase loi jabole paorivaar ke ekta gyani tarika pora, tai laga mota aru bacha khan ke dhek bhal kuribole, aru tai khan laga khorcha khan ke thik cholabole nimite. Aja laga homoi te, shadi khali kotha pora hi ase. Bishi dalali manu khan ase jun khan koi ke tai khan bishi dahej khan pabo, poisa pabo aru gehena khan pabom Jodi tai khan utu porivaar logote rishta bonai. Aru inika hi tai khan khali poisa laga uporte bhabna kuri kene poisa pora dangor thaka laga porivaar logote hi rishta bonai, hoilebi iku gyan nathaki kene, aru inika hi tai khan bishi dukh pai pura tai khanlaga jibon te.

Proverbs laga kitab te, bishi maiki khan laga kotha ke koi kene ase, bishi bhag gyani maiki laga kotha. Bishi porivaar khan biya hoishe budhu maiki khan pora.

Dusra tu hoile, ami khan pure gyani maiki laga kotha khan 31 chapter te proverbs laga kitab te. “Kun bisari bo paribo guni maiki? Kile koile tai laga mulya tu rubi khan pora bi upor ase”proverbs 31:10. Itu bhag te bishi sundor pora ekta maiki laga gun khan ke koi ken ease. Jun khan tai nijor nimite maiki bisari ase, tai khan itu pobitro kotha laga bhag ke puribo lage bar bar.

Tisra tu hoile, ami khan pure mridu maiki laga kotha 1 peter 3:4 “holebi hobole dibi tai khan ke mon-bhitor te thaka manu, jun hi biya nahobole laga sundor ta mridu aru thanda atma laga, juntu hi bishi kimti ase isor laga nojor te. Itu nishina hi age laga homoi te, pobitro maiki khan jun isor ke Biswas kure tai khan nijor ke bi sajai, jun hi nijor ke diye tai khan lag mota khanke. 1 peter 3:4-5.

Charta tu hoile, pobitro kotha te koi maiki khan laga kotha jun hi isor ke bhoi kure, proverbs 31:30 te, akarshan tu misa ase aru sundorta bi par hoi, hoilebi maiki jun isor ke bhoi kure, tai ke hi mahima hobo. Pashta te,a mi khan pure maiki laga kotha jun hi icha kura laga mon thake exodus laga kitab te. Tai khan ahe duijon maiki motta, jiman bishi icha laga mon thke tai khan laga gehena khan juntu sona laga ase, exodus 35:22. Maiki khan jun hi diya laga icha kura laga mon thakishe, tai khan khushi pora isor ke dishe. Tai khan samarthan diye aru prathana kure isor laga ministry karone. Tai khan hi isor laga ministry karone bishi dangor bhag loi.

Aji bhabna kuribole laga pobitro kotha tu hoile 1 timothy 2:9-10. Inika nishina hi, jun tu maiki saje tai khan nijor ke bhal kapra te, thik pora aru sanjam hisab te, jun hi chuli ke bini nakure nahoile hi moti nalagai nahoile bi dami kapra nalagai, hoilebi jun hi thik ase maiki khan karone jun hi isor swikar kora aru bhal kam logote hoi.