ਮਾਰਚ 15 – ਉਹ ਤੁਹਾਨੂੰ ਖੜ੍ਹਾ ਕਰੇਗਾ!

“ਪਰ ਉਹ ਸਥਿਰ ਰਹੇਗਾ ਕਿਉਂ ਜੋ ਪ੍ਰਭੂ ਉਸ ਨੂੰ ਸਥਿਰ ਰੱਖ ਸਕਦਾ ਹੈ”(ਰੋਮੀਆਂ 14:4)।

ਪ੍ਰਭੂ ਤੁਹਾਨੂੰ ਚੇਤਾਵਨੀ ਦੇ ਰਿਹਾ ਹੈ। ਉਹ ਚੇਤਾਵਨੀ ਕੀ ਹੈ: ਕੀ ਤੁਸੀਂ ਉਨ੍ਹਾਂ ਲੋਕਾਂ ਨੂੰ ਦੋਸ਼ੀ ਨਾ ਠਹਿਰਾਉ ਜਿਹੜੇ ਭਟਕ ਗਏ ਹਨ। ਕਿਉਂਕਿ ਪ੍ਰਭੂ ਆਪਣੇ ਪਿਆਰ ਦੇ ਦੁਆਰਾ ਉਨ੍ਹਾਂ ਨੂੰ ਆਪਣੇ ਕੋਲ ਵਾਪਸ ਲਿਆਉਣ ਦੇ ਯੋਗ ਹੈ।

ਇੱਕ ਵਾਰ ਇੱਕ ਵਿਸ਼ਵਾਸੀ ਨੇ ਆਪਣੇ ਰਸਾਲੇ ਵਿੱਚ ਇੱਕ ਪਾਦਰੀ ਦੁਆਰਾ ਕੀਤੇ ਗਏ ਗਲਤ ਕੰਮ ਦੇ ਬਾਰੇ ਬਹੁਤ ਸਮਾਂ ਪਹਿਲਾਂ ਦੱਸਿਆ ਸੀ। ਉਨ੍ਹਾਂ ਨੇ ਬਹੁਤ ਨਿੰਦਿਆਂ ਕੀਤੀ ਕਿ ਪਾਦਰੀ ਨੇ ਵਿਸ਼ਰਾਮ ਦੇ ਦਿਨ ਦੀ ਸਹੀ ਢੰਗ ਨਾਲ ਪਾਲਣਾ ਨਹੀਂ ਕੀਤੀ। ਉਸ ਰਿਪੋਰਟ ਦੇ ਕਈ ਸਾਲਾਂ ਦੇ ਬਾਅਦ, ਸਬੰਧਿਤ ਪਾਦਰੀ ਨੇ ਉਹ ਰਸਾਲੇ ਨੂੰ ਪੜ੍ਹਿਆ। ਉਦੋਂ ਤੱਕ, ਇਹ ਸੰਭਵ ਹੈ ਕਿ ਪਾਦਰੀ ਪਹਿਲਾਂ ਹੀ ਉਸ ਗਲਤੀ ਨੂੰ ਸਵੀਕਾਰ ਕਰ ਚੁੱਕਿਆ ਹੋਵੇ ਅਤੇ ਪਰਮੇਸ਼ੁਰ ਤੋਂ ਮਾਫ਼ੀ ਪ੍ਰਾਪਤ ਕਰ ਚੁੱਕਿਆ ਹੋਵੇ, ਅਤੇ ਉਸ ਦੀਆਂ ਨਜ਼ਰਾਂ ਵਿੱਚ ਧਰਮੀ ਬਣ ਗਿਆ ਹੋਵੇ।

ਪਰ ਉਸ ਰਸਾਲੇ ਦੀ ਰਿਪੋਰਟ ਨੇ ਉਸ ਨੂੰ ਦੋਸ਼ੀ ਠਹਿਰਾਉਣਾ ਜਾਰੀ ਰੱਖਿਆ। ਜਦੋਂ ਕਿਸੇ ਨੇ ਉਸ ਰਿਪੋਰਟਰ ਦਾ ਪਤਾ ਲਗਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਪਤਾ ਲੱਗਾ ਕਿ ਉਹ ਮਾਨਸਿਕ ਬਿਮਾਰੀ ਨਾਲ ਪੀੜਿਤ ਹੈ ਅਤੇ ਉਹ ਆਪਣੀ ਹੋਸ਼ ਗੁਆ ਬੈਠਾ ਅਤੇ ਇੱਧਰ-ਉੱਧਰ ਘੁੰਮ ਰਿਹਾ ਹੈ। ਕਿੰਨੀ ਤਰਸਯੋਗ ਸਥਿਤੀ ਹੈ!

ਪਵਿੱਤਰ ਸ਼ਾਸਤਰ ਸਾਨੂੰ ਦੱਸਦਾ ਹੈ: “ਤੂੰ ਦੂਜੇ ਦੇ ਸੇਵਕ ਉੱਤੇ ਦੋਸ਼ ਲਾਉਣ ਵਾਲਾ ਕੌਣ ਹੁੰਦਾ ਹੈਂ? ਉਹ ਤਾਂ ਆਪਣੇ ਹੀ ਮਾਲਕ ਦੇ ਅੱਗੇ ਸਥਿਰ ਰਹਿੰਦਾ ਜਾਂ ਡਿੱਗ ਪੈਂਦਾ ਹੈ, ਪਰ ਉਹ ਸਥਿਰ ਰਹੇਗਾ ਕਿਉਂ ਜੋ ਪ੍ਰਭੂ ਉਸ ਨੂੰ ਸਥਿਰ ਰੱਖ ਸਕਦਾ ਹੈ”(ਰੋਮੀਆਂ 14:4)। ਕਹਾਉਤਾਂ ਦੀ ਕਿਤਾਬ ਵਿੱਚ, ਅਸੀਂ ਪੜ੍ਹਦੇ ਹਾਂ ਕਿ ਧਰਮੀ ਸੱਤ ਵਾਰ ਡਿੱਗ ਕੇ ਵੀ ਦੁਬਾਰਾ ਖੜ੍ਹਾ ਹੋ ਜਾਂਦਾ ਹੈ। ਨਵੇਂ ਨੇਮ ਦੇ ਯੁੱਗ ਵਿੱਚ ਪ੍ਰਭੂ ਵਿਸ਼ਵਾਸੀਆਂ ਨੂੰ ਹੋਰ ਕਿੰਨੀ ਕਿਰਪਾ ਦੇਵੇਗਾ? ਜਦੋਂ ਇਹ ਸਥਿਤੀ ਹੈ, ਤਾਂ ਤੁਸੀਂ ਦੂਸਰਿਆਂ ਦਾ ਕਿਵੇਂ ਨਿਆਂ ਕਰ ਸਕਦੇ ਹੋ?

ਰਸੂਲ ਪੌਲੁਸ ਕਹਿੰਦਾ ਹੈ: “ਜਿੰਨਾਂ ਚਿਰ ਪ੍ਰਭੂ ਨਾ ਆਵੇ, ਤੁਸੀਂ ਸਮੇਂ ਤੋਂ ਪਹਿਲਾਂ ਕਿਸੇ ਗੱਲ ਦਾ ਨਿਆਂ ਨਾ ਕਰਿਆ ਕਰੋ, ਉਹ ਆਪ ਹਨੇਰੇ ਦੀਆਂ ਛਿਪੀਆਂ ਗੱਲਾਂ ਤੇ ਪਰਕਾਸ਼ ਕਰੇਗਾ ਅਤੇ ਮਨ ਦੀਆਂ ਦਲੀਲਾਂ ਨੂੰ ਪ੍ਰਗਟ ਕਰੇਗਾ। ਉਸ ਵੇਲੇ ਹਰ ਕਿਸੇ ਨੂੰ ਪਰਮੇਸ਼ੁਰ ਦੀ ਵੱਲੋਂ ਵਡਿਆਈ ਮਿਲੇਗੀ”(1 ਕੁਰਿੰਥੀਆਂ 4:5)।

ਪ੍ਰਭੂ ਯਿਸੂ ਮਸੀਹ ਲਗਾਤਾਰ ਤੁਹਾਨੂੰ ਦੇਖ ਰਹੇ ਹਨ। ਤੁਸੀਂ, ਜਿਹੜੇ ਉਸ ਦੇ ਲਹੂ ਦੁਆਰਾ ਧੋਤੇ ਅਤੇ ਸ਼ੁੱਧ ਕੀਤੇ ਗਏ ਹੋ, ਸਿਰਫ਼ ਉਸ ਦੇ ਹੋ। ਅਤੇ ਉਹ ਤੁਹਾਨੂੰ ਆਪਣੇ ਰਾਹ ਵਿੱਚ ਲੈ ਜਾਂਦਾ ਹੈ, ਤੁਹਾਨੂੰ ਅਨੁਸ਼ਾਸਨ ਦਿੰਦਾ ਹੈ, ਤੁਹਾਨੂੰ ਝਿੜਕਦਾ ਹੈ ਅਤੇ ਤੁਹਾਨੂੰ ਸੁਧਾਰਦਾ ਹੈ।

ਪ੍ਰਮੇਸ਼ਵਰ ਦੇ ਬੱਚਿਓ, ਤੁਸੀਂ ਅਕਸਰ ਆਪਣੇ ਦੁਨਿਆਵੀਂ ਜੀਵਨ ਵਿੱਚ ਥਕਾਵਟ ਨਾਲ ਦੂਰ ਹੋ ਸਕਦੇ ਹੋ। ਪਰ ਡਰੋ ਨਾ। ਯਹੋਵਾਹ ਜਿਹੜਾ ਕਮਜ਼ੋਰਾਂ ਨੂੰ ਬਲ ਦਿੰਦਾ ਹੈ ਅਤੇ ਨਿਰਬਲਾਂ ਨੂੰ ਤਾਕਤ ਦਿੰਦਾ ਹੈ, ਉਹ ਵੀ ਤੁਹਾਨੂੰ ਆਪਣੇ ਪਿਆਰ ਵਿੱਚ ਮਜ਼ਬੂਤ ਕਰੇਗਾ।

ਅਭਿਆਸ ਕਰਨ ਲਈ – “ਅਰਥਾਤ ਉਹ ਅਵਿਨਾਸ਼ੀ, ਨਿਰਮਲ ਅਤੇ ਨਾ ਮੁਰਝਾਉਣ ਵਾਲੇ ਅਧਿਕਾਰ ਲਈ ਜੋ ਸਵਰਗ ਵਿੱਚ ਤੁਹਾਡੇ ਲਈ ਰੱਖਿਆ ਹੋਇਆ ਹੈ। ਤੁਸੀਂ ਵਿਸ਼ਵਾਸ ਦੇ ਰਾਹੀਂ ਪਰਮੇਸ਼ੁਰ ਦੀ ਸਮਰੱਥਾ ਨਾਲ ਉਸ ਮੁਕਤੀ ਲਈ ਬਚਾਏ ਰਹਿੰਦੇ ਹੋ, ਜੋ ਅੰਤ ਦੇ ਸਮੇਂ ਪ੍ਰਗਟ ਹੋਣ ਵਾਲੀ ਹੈ”(1 ਪਤਰਸ 1:4,5)।