Mar 04 – Tai pora apuni ke cholai kene ulabo!

Deuteronomy 11:23 titya isor cholai kene ulabo itu khan sob desh ke apuni laga agete, aru apuni awsikar kuribo dangor aru tagot thaka desh khan ke apuni pora.

Isor hi apuni karone khara kure aru apuni karone anurodh bikure. Tai apuni karone lorai kure. Aru tai hi sob desh khan ke aru manu khan ke cholai kene ulai kun apuni laga khilaf te khara kure. Aru itu sob laga uporte, tai apuni ke tagot bi kure utu desh aru manu khan ke khedabole jun apuni laga khilaf te khara kure.

Israel manu khan canaan ke loi lua agote, itu bishi jati khan, taikhan laga raja aru sipahi khan thaka laga jaga thakishe. aru judi Israel manu khan itu ke kabza kuribole thakishe, titya hoile tai khan poila itu raja aru tai khan laga sipahi khan logote lora kuribole lage.

Pobitro kotha te bishi jati khan laga  mati laga kotha koi ken ease. Deuteronomy chap 7 te jitya ami khan pure: “jitya isor apuni khan laga Jehovah apuni khan ke ani boutu mati te juntu apuni khan lobule ase, aru  ulai dibo bishi desh khan ke apuni laga agete, hittites aru girgashites, amorites, canaanites, perizites, hivizites aru jebusites khan ke sata desh juntu apuni khan pora dangor aru tagot thaka ase, aru jitya isor apuni khan  laga Jehovah apuni khan ke dibo itukhan sob ke, apuni tai khan ke jitibo aru khotom kuri dibo tai khan ke. Apuni khan iku rsihta nathakibo tai khan logote aru iku daya tai khan ke nadikhabo.” Deuteronomy 7:1-2.

Itu te atma laga kotha ase itu satta jati te. Bhabna kurile itu satta group khan t isor laga dushman ase. Apuni khan tai khan ke bhoi nakuribo lage. Isor pora hi taikhan ke ulai dibo. Itu ekla nahoi kene. Tai pora apuni khan ke tagot bi dibo tai khan ke ulai dibole. Gau hi sobse khas dushman ase isor laga laga bacha khan laga. Lobh aru itu laga rsihta mili kene gau logote apuni khan laga atma laga jibon khilaf te khara kure. Bishi ase jun khan harishe, alag hoi jai aru isor laga kosom khan napa hoi jai kilei koile tai khan laga gau laga lobh pora.

Kijani apuni khan bi jibon te ani ase itu jitya laga nathaki kene. Mon tan hobi, ami khan laga isor apuni khan ke jitvai dibo. Isor pora hi apuni khan ke kripa kuribo itu prithibi ke jitibole, itu gau tai laga lobh aru satan uporte. Dhuri kene thakibi isor ke jun hi apuni khan ke jitai diye, ki apuni khan dikhibole Biswas pora, juntu biya khan dushman pora bhabna kuri ase apuni laga khilaf te ulai kene kedai dibole.

Arubi kun khan ase manu khan aru tai khan laga desh khan itu verse te koa tu. Israel manu khan jun khan ke jasus kuribole pathaishe utu mati te tai khan koishe: titya ami khan dikhishe diatya(anak laga bansh khan daitya pora aha ase) numbers 13:33. Itu dushman khan tagot thaka aru dangor hoilebi, isor pora tai khan sob desh aru itu laga jati manu khan ke Israel manu khan laga usorte ulai dishe taikhan laga mati pora. Isor laga bcha khan,isor pora apuni khan karone bi dangor kam khan kuribo apuni laga jibon te bi..

Aji bhabna kuribole laga pobitro kotha tu hoile Deuteronomy 11:25 kun manu bi apuni laga khilaf te khara kuribo naparibo; isor apuni khan laga Jehovah dhali dibo apuni khan laga bhoi tai khan uporte jote apuni khan jabo, jinika tai apuni khan ke koishe.