Feb 12 – Ladladjelen!

“Ayengan a mandra rojol-j’e lingan haten anin Gamangtungan a d’ong bantongte” (Bangsa Hanang 14:2).

Dile tordong ladlajelen mengenaben dete. Do itedeleja kanalkalan, yiraiteden anabasudan tanunjingan. Amben ateng janabanji abmele agarberle, dile tagaldaba. Nami saring amben ladladjen batte garbernaba. Garba Kitungan amangba amben engale abrabdaben, itedelejanang kanalkalan orde itente mandrengnalingben daku antate.

Buteja gamle adraptie bo mandran a ladladjena abmele. Jajingante amandranji angante barabdateji aninji itejanang gamteji. Aninji rurdintenji do tudtudtinji. Kun ayamling butn buten ate mandran a d’ong tuabteji. Bo tagor aninji kan ambrij lumlenjiden, kun ayam aninji abmele iteja rapti adea.

Angante Kitungan Mojes a d’ong anab-bagu tara olangle, Anin gamle: “itente mukabana adaku areng oblinga, eteden d’an dungtinai”. Bindo Mojes, Israelanji amurmurlenanji asan, anin barabdale do arengan a d’ong tudle dan dunglenai arengan saring? Mojes, anin arengan a d’ong aolangben dakule, bandraban batte anin arengan a d’ong tudle.

Anlen galamtabe kan batte Mojes. Anin Kanan-lingan ganle adrabtiad. Tiki anin Kitungan abm’oihle ateng ayam, bindo anin kanan lingan mandreng mattan sikoija ganle adrabtiad.

Raja Ujian janang Bibol-lingan okij bo mandra abarabdalen ate rabangtabe. Angante a j’en anabdainan dele, anin Kitungan asangemlen yirre do kanuban soile itente alumben adakuad antate lumle kun murda buyanji batte alumben dakule. Do kun asan bo surda kanalkal-lingan galule, do karahidan sikoija anin muta bimbiman batte dakule. Bogad amben kan ambrij akanalkal-lingan adakulenden, oan ayam amben barabdataben, kun ayam Kitungan amangba garba do artabmaba. Baraban abmele kilkilen dakunaba, kan ambrij bandrabanji yirtai manglinben d’ongben abs’idben asan, bogad amben ladladjenan adakulenden.

Pitor, Jisun a hanangnamar ayengan amandran adule barabdate. Akardiban table do sanumaran alud gadle sideten, buten anin bosurda buyamar dakule. Kitungle Jisun kan ate gijle. Anin kun sanumaran aludan abjidle do absamangle. Do Anin pitor a d’ong gamle kardibnan dakua.

Tanahimdam Kitungan a onagji, angante amben kan ambrij akanlakalan yirtai amben abarabdadong, garbernaba yirba. Kitungan atmangba surpidamnaba do a d’ongan abguguba, mangben saring kan kudduban table asidten sikoija. Kan batte, er maridan saring anablun ahangte.

Okiy Kinolbe absele: “Mandran a roitad usaltaman apsele rajanji m’oihteji, bar hadabber maran a d’ong aninji timyimteji” (Bangsa Hanang 16:13).