Feb 11 – Rojol-j’e!

“Rojol-j’e mar er bantonglabe haten, bindo bongkorde hanagod maran ganalaman dete” (Bangsa Hanang 9:11).

Bangsa Hanang kambol-lingan ‘Rojol-j’e batte a hana’ beran rabangtabe. Iten Rojol-j’e? anlen agijtaben a berna ‘Rojol-j’e’ gamlenden ‘Jananrdi’. Rojol-j’e gadlamte mandrengna beran, marid do er jolda uggaran gadlamte. Bo bangsa beran er joldanan baranji, janardi orde sakai – bangsa baran pangtai lanagadan batte do roitadan batte.

Amben bangsa j’on janang arabangte mandrengna rojol-j’e. kanina ate agaja adjoldane do abtairuje. Aninji banudidam do Rojol-j’e batte hatenji kuddub godmandrengna-lingan.

Gamangtungan saite manglen saring abrojol-j’e. Noa mandradam dakule, amandrengna lingan adnang, kuddub mandranji pintu-lingan dakuleji do er marid-lingan. anten asan Kitungan amang saring asuyeman hangle (Aparamanta 6:8).

Gamangtungan rabangle Noa ayamlen kuddub mandranji duaihlingan barij dakuleji do a uggarlinganji er maridan dakule. Anten asan Kitungan kuddub ordaran ads’iben oskaile. Bindo Noa a rojol-j’e batte, Gamangtungan anin do a birindanji bungsan-lingan rable. Kun ambrij Gamangtungan abraam a d’ong gudingle do gamle: “Abram unji kurdi-miggal-gulji minhum ayam adnang Gamangtungan anin a d’ong apsuidamlen gameten, Hen Kuddub Ranapti Kitungan. Temang-ling-Hen roitad lanuman luman lumle roitad dea” (Aparamangta 17:1).

Buten buten ate bo berna gamteji do bo baran lumteji kan ate ansadagena, rojol-j’e-lingan dakulen adraptieji. Buten buten ate hanangan tiyte bindo adbojoraiji. Amanganji rojol-j’e agasan batte. Bo mandran dakule ateng sidrunganji lumle, bindo anindaman asidrungan bangsale adead, iten asan gamlenden amangan rojol-j’e adakuad.

Aten anegoi dakuji, akanalkal-linganji kan ambrij adrabangeji do atanakud-lingan kadhidamtinji. Do lebun agsan batte orde baran adhagenji asan. Kan ate rojol do janardi adakuen asan amangdrengna linganji. Itendele akinolan janang, mandran rojol-j’e sanaisai. Angante amanganji rojol-j’e dakute, kun batte haling raptite.

Tanahimdam Kitungan a onagji, bogad mandrengnaben bo sungdangan ambrij radu deate agamlenden, amben lagad-damlen do janardin batte do rojol-j’e batte adakunaben dete Kitungan amangba. Mangdrengnaben a rojol-j’e batte radu abmete.

Okiy Kinolbe absele: “Gamangtungan a ganijgij lingan amben er dusadage a deben dete” (Bagujuaber 18:13).