Jan 30 – Dukh pora thik hoa!

Hebrews 2:10 kile koile itu hi thik thakishe tai nimite, jun karone sob saman ase aru jun pora hi sob saman ase, anibole bishi chokra khan ke mahimate, banabole sobse dangor tai khan laga mukti thik dukh pora.

Pobitro kotha te sapha pora shikai kene ase ki khali dukh pora hi apuni khan thik hobo Isor laga rajyo te ghushibole. Sobse morom laga chokra Isor laga niche te ahishe prithibi te, ami khan karone.  Aru itu hi thik lagishe baba Jehovah ke, thik kuribole Jisu ke, amikhan laga mukti laga Isor ke dukh par kuribo di kene.

Pobitro kotha te koi: matthew 16:21  utu homoi pora Jisu dikhabole shuru kurishe tai laga chela khan ke ki tai jabole lage Jerusalem te, aru dukh pabole bishi saman karone dangor khan pora aru dangor pujari khan pora, aru moraidibole aru tin din pichete  uthibole ase.

Peter tu bhoi nakure aru tagot thaka laga ekta thakishe jisu laga chaela khan majote. Matthew 16:22,23 peter Jisu ke ekta kinar te loi jai kene gussa  pora koishe: isor apuni logote inika hobole nadibi. Tai koishe apuni logote inika nahobole lage. Jisu ghuri kene peter ke gali di kene koishe: satan ami laga usor pora jai jabi. Apuni amilaga rasta ke bon kuri di ase . kile koile itu bhabna manu pora ahanai isor pora ahi ase.

Manu kahn ahram jibon bhabna kure, hoile bi isor utu jibon ke bhabna kure juntu  dukh pai kene thik hoi. Jitya manu agh barhi jabo koi kene bhabna kure, isor pora itu prithibi ke gujal maribole krus te bhabna kure. Jitya manu bhabna kure naam kamabole, isor bhabna kure nijor ke khali kuribole manu nimite krus te uthi kene. Isor laga bacha khan krista laga bhabna apuni khan te hobole dibi.

Pobitro kotha te koi 2 timothy 3:12 hoi jun khan icha kure swarg laga Krista Jisu nishina thakibole tai dukh pabo. Phillipians 1:29 kile koile apuni ke dishe krista laga namte, khali Biswas kuribole nahoi, hoilebi dukh pabole tai nimite.

Jisu kityabi shikanai tai laga chela khan ke ahram aru khushi laga jibon thakibole. Shuru pora hi, tai chelakhan ke dukh pabole hi tayar kurishe.

Jisu koishe john 16:33 prithibite apuni khan dukh pabo; hoilebi khushi thakibi, ami prithibi ke jitishe. Isor laga bacha khan, hodai yaad rakkhibi ki krista jun hi itu prithibi ke jitishe, tai apuni logote ase apuni laga sob dukh te juntu apuni par hoi. Kityabi dukh aru digdar nimite nijor ke Isor pora alag nakuribi. Aru ag barhi jabi thik rasta te.

Aji bhabn kuribole laga pobito kotha tu hoile 2 Timothy 2:11,12 judi ami khan more tai logote, amikhan thakbo tai logote. Judi amikhan bardash kuribole pare, amikhan tai logote raj kuribo.