Sep 20 – ANIN BANANGSAN DETE!

“Lanangkan saring lanangka-len Janggardan lan’an endrang de-en sikkoi ja, do rzngrzng darakunan kaitan jannongan endrang de-en sikkoi ja, do kaitam jannongan,  tulaban, gamle danisaman endrang de-en sikkoi ja, ettegoi na dakute” (Jisaiya 32:15).

“Rzngrzng jaga aboi dernadage a jannong” nami Kitungan atiyaitenan ajzbjzb-ber. Kitungle ayengan a Kitung asarsolan saring kuddub janabanji gabdelte. Agasa-lingan saring Anin kuddub gabdele. Do rzngrzng jannong-lingan Anin agaban abpadapte.

Amben ateng ayam saring a rzngrzng jannong-lingan haling adakule pede. Amben pede jaja-lingan daku, iten asan gamlenden mangben ejaja lebu-adakuad. Jajaben tardaayam adakune. Angante Kitungan a janggardan mang-ling-ben yirtai lanankaban saring, Anin janggardage mandrengnaben abaurte. Angante ruangan asanan ranindete kun ayam amben ordardage asanittan batte barij debente.

Anablu aparamangta denna-lingan, bo buhangan ahiman dakule- Sam Jebadurai, atakudben jznjzndage. Anin a s’ing-lingan amanle garbernaben gamle kuddub a rzngrzng-lingan ajannong barara jannongdeben dete gamle garbereten. Kun Pastron hangan tiyle ayam-ling, anabsitan batte Kitungan kun buhangan a d’ong hamdramle do hangan tiyle kun adenna saring. Kun buhangan derneten. Do kun adenan saring Kitungan appailai kuddub anabsitanji bangsa mandrengna. Janggardadage amandrengnan Marid Janggardan abhananeten.

Jisaya gamete: “Rzngrzng tulaban do asarsol desan man’oihdam dete, do lakkijsol desan erdikadam dean dele gulapi-taran ambrij langga radte; Antate ateng radte do man’ihan do erdikan batte kente; Libanon a ganugun do Karmel do Saron a lananggan kan desan a d’ong taniyan dete. Aninji Gamangtungan a ganugun do Kitung-len a lananggan gijteje” (Jisaya 35:1, 2).

Ajardina amben ganamangan asanittan ahangte. Solomon Gamete,  yagi garuban amandranji abmele, buten daina dete. Bo garuban ate – “Ayengan a mandra Gamangtungan amang lingan derderten, anin b’e m’oihte” (Bangsa Hanang 28:25) Anab bagu garuban – Dernamaranji abmele “Bindo rojol-j’e maran a tambun banangsa lingan dakute” (Bangsa Hanang 14:11). Anab yagi garuban – Suyemtiymaranji abmele “Suyemtiy maran a j’en b’e m’oihte” (Bangsa Hanang 11:25).

Bangsa ganuran adakute ajannong-ling langa j’o do langan ganijta dete. bindo nami agijtaben aberna, Kitungle ajzbjzbte aberna arzngrzngan abaranaben abmele. Tanahimdam Kitungan a onagji, Kitungan amang j’e-e-ben surpitba do Anin kuddub saggaile ateng absitataben, kanalkalben odsale.

Okiy Kinolbe absele: “Roitad maranji sindi nebanji ambrij r’ale j’oteji aninji Libanon a eros aran ambrij marangteji; Aninji Gamangtungan a s’ing lingan a guned aranji ambrij aninji Kitung-len a sarebasing lingan r’ale j’oteji” (Sanenken 92:12,13).