Aug 16 – Hadab Dete!

“Asuyem-Hen tullatam, iten asan gamlenden, er t’ulan batte ranapti-Hen hadab dete” (2 Korintia 12:9).

Er t’ulan batte Kitungan a ranapti hadab dete. Agante agante, Kitungan er t’ulan anordin tiyte manglingle. Anin lumte kan ate iten asan gamlenden hadab loge ranapti ahangben asan.

Agante er t’ulanji yirtai manglingle kun ayam Kitungan a d’ong saitabe. Edjalingden, buteja Kitungan anablu adnayime. Ayirtaine a denaling janangan Kitungan ad’ong anabgugu ade-e. Anin d’ong-ling-le er t’ulan appaitai kun asan anlen barij j’ee batte amanglingan dakutebe a ranapti do anablu ayangben asan.

Anappai Pole r t’ulul lingan dakule. Anin gamete, “Bar ateng ranangbaiberan asan yante gamle hen adlzngdamnai, d’ongan apsele ebban ambrij taniyan delih, antate duaih suman abo pisirdiage dele, yante gamle hen abmele, anin lzngdongnete, gamle anin rapti abasudatih, bar yante gamle kan anasudan mang-hen saring yerte, kun asan yagi tara Gamangtungan amang garberrai” (2 Koritia 12:7,8).

Kitungan anindaman gamdamnete Pol a er t’ulan abmele. Kitungan Pol a d’ong ateng tanalmadan do anabpungge berna tijle. Kun batte Pol pede kinsaten badenben bindo Kitungan er t’ul-lingan dakule.

Gamangtungan gamete, ‘Agante kan er t’ulanji manglingnam dakute, kinsana adyirai. Lagad-damling do baturling ranapti-ling-hen dakute. Hen d’ongben handramtai ayirtahen a denaling.

Anten asan, er t’ulben agijgijtong. Anablulingan gijgijba. Ranapti-Hen er t’ulben Hadab abmete.’ Anaippai Pol kun ate man’oihan batte jaeten. Anin Kitungan a ranaptiling do anablulingan abadturneten asan anin a d’ong Kitungan ranaptidage hangdramle.

Tanahimdam Kitungan a onagji, er t’ulan abmele a kugidongne. Baraben batte barij hadab dakutenai gamle a omdidong. Er t’ul-lingan er dakuleden, Kitungan a rumangbaran lumben dete. Ite deleja Kitungan anablu ranapti lingan dakunaben dete, Kitungan aranapti manglingben yirtai. Kitungan abmele amben janangan a lumte.

Kinolbe absele: “Kitungan sedaeten, yante gamle Anin ranapti maranji a d’ong rapti gabrite” (1 Korintia 1:27).