Aug 07 – Baralingan Manaridan!

“Anten asan amben a jumlenden orde a galenden, orde itente itente amben a lumlenden, anta kuddub Kitungan a ganugu panemengan apsele lumba” (1 Korintia 10:31).

Amben itedenjangan alumlenden, manaridan batte lumba. Tanimyim Kitunglen kan ate tiyaten, lanagadan do janardin batte alumben. Papwr Anosaijlingan, gamte, “Bar kun a dinna lingan Gamangtungan apsele, Marid, gamle kan anidan kurtanji a sangka lingan atadeng lingan dakute, bar Gamangtungan a s’ing lingan a dakun a mandi janabanji kanub aranggan a mukkaban danakkun deten a marid mandinji ambrij dete” (Jikoriya 14:20).

Tenne galamtabe ‘Kitungan a Manaridan’ kurtanji a sangka lingan atadeng lingan dakute. Kun ambrij, kurtan aboi jongtu hanamdram dete. Sagarda abmele janangan hanamdram dete bara lingan. Kan ate s’ingan abahiraba baraten. Tenne a gijtaben ate Gamangtungan a s’ing Jerusalem lingan marid gamle dakunaben dete. Bahiraba marid gamle adakutenben ate sattang ted bindo bangsa bara lumle marid dakunaben dete. Alumten a bara ordardage orde Jnaggardadage, bindo baralingben manaridan dakuben dete.

S’ingan baralingan, j’e-e-ling-nam gamben dete ‘Kitung J’e-e-hen gijda-a do madrida.’ Bararaling-nam janangan, Kitungan ad’ong ayimba ‘Kitung, aj’ote-hen ara ambrij abmehin.’ Amben pede doctor orde engineer, orde bigarda bigarda a bara lingan adakuten. Iten janangan baraling adakulen janangan, ordaran gijben dete amben mandrengna kitungan agankilte manaridan batte kuddub bararalingan.

Desaling-len, ateng mandranji banagilingan dakuji baran erhangan batte. Bindo, Gamangtungan kuddub tiylangten. Kitungan a sakki mar deben dete darakunaling-len ijapo?

Agante Jisun Ordarlingan dakule Anin bara-ling dakuneten. Sablangmar dakule a dangarda sikoija. Agante kitungan a baralumle, Anin derna batte lumeten. “…..Uyungan a dakulen adnang appailihen a U’an a baran a lumben detalen. Togalan yertai, antadnang buteja rapti abbaranji” (Jon 9:4). Kan a berna j’e-e-lingan dakuben dete. Jisu Kristun janangan mangale, dulejdale do argaldale, bindo kan kudduban anin adnogandead, Anin Kitungan aitsuman abojoraile togal do tamba. Tanahimdam Kitungan a onagji, manaridan batten baran lumle janggardan lingan dakunaben dete.

Kinolbe absele: “Ayengan a mandra a baradam lingan umengdam, anin oseng maranji a temang er tananglabe rajanji a temang tanangte” (Bangsa Hanang 22:29).