Aug 01 – Marid Kitungan!

“…do tamba-togal er kaddablabe gamteji, Mariddam, mariddam, mariddam, Barij Ranaptidam Gamang Kitungan na. Anin dakule, nami daku, do yertai” (Anabpungge 4:8).

Kitung-len Marid Kitung-len na. karalogee a gijtabe abirna amang-lingan a Manariddan ate. Marid Kitungan ogandite do Anin ambrij amben janang Marid-lingan dakunabe dete. Kitungan Jon ad’ong jab-boble, Anappai gamle Marid Janggardan batte, do anin ad’ong Ruang-rajamban a nurungan dele do absuile ruang-lingan iten adeten ate. Iten anin gijle tette? Aninji gijleji Gamangtungan ad’ong abgugutenji tamba-togal er kaddablabe a gamteji Mariddam, mariddam, mariddam’.

Soura langlangan batte kan a birna bananda dele, ‘Mariddam’ anabyagi tara ranabangan dele bindo bigrda lang-lang-lingan ate anabtinji tara anidolan dele. Kitung-len yagikune do anten asan Anin ad’ong ganaman dele ‘Mariddam’ yagi tara. Yagikune Kitungle Mariddam.

Ordaran enrang ganabdil de-en adnang saring Anin Mariddam. Nami janang Anin Mariddam do ayirtahen adenna-ling janang Mariddam dakute. Asusunan saring Anin Mariddam. Kitungan a Manaridan errahidagge. A lanangan, ad’ongan do aganiytan Mariddam.

Marid Kitungan d’ong-len gudi-gaiten marid gamle. Mandrengna ling-len janang abmele manaridan ate ogandite. Anin mangle saring manariddan agijben asan saite anten asan anlen marid adeben dete. Anin marid gamle a gudigaiten asan tarangdiling adnumdrenglane. Anin d’onglen sedaiten asan anlen marid addelangne sikoija adnumdrenglanne.

Kitungan a ganijgij lingan janang anlen aboi Kitungan a On deben dete. “Iten asan gamlenden amben Gamang Kitung-ben apsele bo marid maranji. Ordar lingan a kuddub mandranji amang linganji saring d’ong-ben Anindam a tanartum bittin a deben asan Gamang Kitung-ben sedabenten” (Bagujuanaber 7:6).

Ija po yan asanitta anlen abmele Marid Kitung-len agankzlben lananga do manaridan batte? Marid lingan adakutenan adnang Kitungan d’ongben sayamte. Agante pasijanji marangteji a U’a maranji m’ohin dete ejapo? Kan abmele ogandiba. Bogad manariddan mandrengna lingan addakulen den, agante amben er marid lingan adakute. Eteden er marid lingan mandrengnaben si’idte ejpo?

Tanahimdam Kitungan a onagji, surpid-damle orde kanuban pangle do kuble marid mandrengna abhanaben dete.

Kinolbe absele: “Bindo engale  Butente gudingtaben mariddam daku, ettele amben ja manannen a passijge a kuddub mandrenggod lingan mariddam deba” (1 Pitor 1:15).