Aug 08 – Engale Anin Abhanate!

“Hen anin amang lingan dakutenai, gamle a berten a mandra, engale Kristu mandreng’nan abhanaeten, ettele janang mandrengnan abhanaben debe na” (1 Jon 2:6).

Kristungan Jisu Kristulen apanadjingan asandungben dete, do Anin batte ahanaben dete. Do ahanaben dete engale Anin haten. Kani na batte daina dete. Bogad amben Anin batte a halenanden, amben amaniben dete, a berna-lingan, abanaiber-lingan. Bogad amben amnilenden do ahalenanden amangban, Anin m’oihten manglingben do mandrengna abriyna-lingan amben daina ahangte.

Europ-desa-lingan, dangarda ayaman aboi boantansingan ambrij u’a-yanganji amang saring. Atenganji ansonji adakunaben itsumteji 14 orde 15 mihnum saring. Atanakud-lingan, aninji sidteji, do sanidban a mandrengnaji yirte, kani kuni-lingan. Aninji gahil-lingan jundarda-lingan kan ambrij sanidan a bara-lingan.

Anoggandinji anson adakunaben batte bo banandan hangtabe gamle ayirtaihn ayaman abmele. Ogandiba bogad ayan ogandietenden kan ambrij a d’a-lingan dile tordong iteban dakunai gamle? Kan D’a-lingan yirtakulenben labo-lingan yirte gamle?’. Bogad kun ambrij anogandi batte yiretenden, a pwrardan umdrengte tuargod-lingan, yirtonghim-lingben. Kun ayaon irdkalen dakuten kun d’a-lingan basule dakunetenden.

Kun ambrij, dile mandranji agalamben dete mandrengna man’oihan, angante Kristu-lingan basute, Kitungan a d’ong timhimba do anosai-beran maneba.

Kitungan tiybenten ganalaman banuddin agalamben asan bangsa do yirsen. Anin dakule mukkababen karahidan do mandreng godan. Bar tiybenten a sedaben asan ordar orde Kitungan a silingan a surpiddamna. Kan ambrij, Anin alun-ling-ben anogandi tiybenten. Angante amben Kitungan amaneten do atimhimte, anirdikan do sanabyun alun uggar-ling-ben arabangte. Kitungan anosaijan lagundamted. Do Anabtagngoran anabsidlangne.

Tanahimdam Kitungan a onagji, Marid Bibolan d’onglen abtangorte. Do jardiloge amben anabsittan a hangte, bogad amben mandrengnaben Kitungan a bernan ambrij abhanalenden.

Okiy Kinolbe absele: “Amben satta Gamang Kitung-ben a d’ong a sandungben dete do Anin a d’ong a bantongben dete; Anin a banaiberanji a manneben dete do Anin a sarrangan amdangben dete; Anin a d’ong a gangkilben dete do Anin amang lingan a galdamnaben dete” (Bagujuanaber 13:4).