Aug 03 – Gailungdan Bargaile!

“Bar anindam a u’an Abraam ayam lingan uante uante a d’an dakulen a gailungdan gaieten, kun a gailungdan Abraam a karahidan a tiki Pilistinji labon batte abyzllenjiate kun a kuddub barokij Issak bargaian bargaile, a u’an a tiyhimlen ahim ahimeten” (Aparamangtan 26:18).

Abraam ayamling itente agailungdan gaiyan dele kun aberan kan ambrij anidolan adelen ate gijtabe, bindo Pilistianji batte abyzllan dele – engang amandranji Kitungan a d’ong asanggemleji. Pilistianji agaramgaman butente endungle do gorodle dakutenji. Anininji sonuman arabmadanjina, butente amukkabanji do akandungbanji kan ambrij daku (Ayob 1:7).

Pilistianji dile ayam manoihan do anirdikan maranji a d’ong abdukkateji. Aninji manoihan anablun a d’ong anabsangan do anabasudan abmeteji. Butente mandrengnalingben pilistianji, sanabyun do manoihan abringnateji? Kayatingge aninji karojosinglengan piteji do banidsaraban, do sanabyuben abs’idteji? Ogandiba do saiba butente butente mandrengna-ling-ben pilistianji do saggaiba.

Sol raja ayamling, ayengan a pilistianji kani kuni gamle Kitungan amandranji a dong gamleji batongle Israelanji a d’ong. Bindo Daudo erbantonglebe yerle do kabhidle kun pilistian amandran a d’ong. Angante kun pilistianji abyzlleji gailungdan Abraam agailen ate, Isak bar okij er bantonglabe hiyeten gaihe. Do bo rumangdage ragal dan hangle, anin do abirindanji moihlenji. Kun batte a jontungji do akuddub mandranji galeji. Bibolan gamte: “Rzgrzng tulaban do asarsol desan man’oihdam dete, do lakkijsol desan erdikadam Hilmy dean dele gulapi-taran ambrij langga radte” (Jisaiya 35:1).

Name mandrenaben ogandiba. Galungdanben bangsapo daku orde ragaldan ahangtepo do mardirdanpo? Manaridan dakupo, janababan dakupo, Kitungan a ma’oihan dakupo atanardu-lingan, mangben saring? Bibolan gamte: “Anten asan anablun a dungdamdan saring aman d’an man’oihan batte gente” (Jisaiya 12:3).

Tanahimdam Kitungan a onagji, Kitungan amangban yarnaiba, butente d’ongben barij manoihan tiyte, manaridan do janababan mangben. Pintuben pingbaba do barokij gailudanaban itente anabyzlan dele ate. Tanimyimbaben yarnaiba. Kitungan d’ongben barokij abangsale ganarberan amandrengna tiybenten, marid janagarda abarij ayam do bara-ling-ben aranptin.

Okiy Kinolbe absele: “Tonanboi-hen do sidrungboi-hen abo antanor kuttan, abo ampanad kuttan do abo andanang dungdamdan” (Solomon a Kanen 4:12).