Aug 02 – Taniyhiman!

“Bar GAMANG Kitungan labon saring jontunji do riang ontidanji gabdelan gabdelle, Adam aninji a d’ong, iten tiyhimte, kan a galamben asan kuddubanji a d’ong anin amangban urungaiten. Seletten Adam kun pwrardanji amang saring butente iten tiyhimeten, anin anten na ahiman dele” (Aparamangtan 2:19).

Angante Kitungan gabdile jontunji do riang ontidanji barij n’ibanji, Anin gabdelle do atengben asan. Anin gamle atengbenten, dile a o’nanji batte awrben dete dilejanabanji. A j’onji batte, mandranji pasinjan akudben dete, do jontunji ja.

Marisan apanglenden, berna asan, amben janang kun ambrij daku, ajar ajar mihnum apwrban ayaman saring. Bogad kun ambrijdelenden, amben, butente d’ongben gabdelle Anindaman ambrij do Kitungan Jisun aranptin adakue badih?

Amben ganabdelan adelle Kitungan ambrij, do amben amaniben dete Kitungan amukkadaman. Amben rajanji a rajan ambrij ahanaben dete, do danisamben Kitungan ambrij adeben dete. Amben janang ranaptidam adeben dete Kitungan ambrij. Engale murkundrangan ambrij, atin ringlen haten a on sionkidanji dakutenji. Kun ambrij, amben butente Kitungan amukadaman batte ganadelan adele, Anin ambrij ahanaben dete.

Angante Kitungan d’ongben gabdelle, Anin adhimle asui sattang ate. Kitungan adhimle tanaran, do togalan. Bindo bigarda ganabdele jananbanji, Anin aitsuman dakule Adam batte adhimben dete gamle, engale Anin ogalle kun ambrij Adam hadab ahimanji batte adhimle.

Kitungan galji anosaijberan tiyle aten asan barij mandranji amaneben dete. Kun ayam-lingan, Anin janang ranaptin tiylai, engale anlen Kitungan a onanji do rajanji arajan. Kun asan, Adam adhimle dile jontunji, dile ontidanji, barij ganabdelle janabanji do kudub neebanji do ajinganji. Nami janang, anlen handramtabe itente Adam tiyhimeten kuddub janabanji.

Tanahimdam Kitungan a onagji, akaridadong amben Kitungan a Onanji do adangardi-onanji. Do alumben dete Kitungan danebaran tiylaben, kan ambrij tiydamna batte.

Okiy Kinolbe absele: “Ranapti dinna-ling-Nam mandra-Namji itsum-taniyge dete; rayzl tagaldan a kasiradan ambrij danggarda mar-Namji mangba-Nam yertaiji” (Sanenken 110:3).