ಏಪ್ರಿಲ್ 18 – ನಾನು ನಿನ್ನನ್ನು ಮೇಲೆತ್ತುತ್ತೇನೆ!

“ನಾನೇ ನಿನ್ನೋಂದಿಗಿದ್ದೇನೆ; ದಿಗ್ಭ್ರಮೆಗೊಳ್ಳದಿರು, ನಾನೇ ನಿನ್ನ ದೇವರು: ಹೌದು, ನಿನಗೆ ಸಹಾಯಕೊಡುತ್ತೇನೆ; ನನ್ನ ಧರ್ಮದ ಬಲಗೈಯನ್ನು ನಿನಗೆ ಆಧಾರ ಮಾಡುತ್ತೇನೆ.” (ಯೆಶಾ 41:10)

ಕರ್ತನು ನಮ್ಮನ್ನು ಎತ್ತಿ ಹಿಡಿಯುವವನಾಗಿದ್ದಾನೆ. ಆತನು ನಮ್ಮ ಕೈಹಿಡಿದು ನಮ್ಮನ್ನು ಮುನ್ನಡೆಸುತ್ತಾನೆ. ಆತನು ನಮ್ಮನ್ನು ಎತ್ತಿ ಹಿಡಿಯುವಾಗ, ತನ್ನ ನೀತಿಯುಳ್ಳ ಬಲಗೈಯನ್ನು ನಮ್ಮ ಕಡೆಗೆ ಚಾಚಿ ಪ್ರೀತಿಯಿಂದ ನಮ್ಮನ್ನು ಮಾರ್ಗದರ್ಶಿಸುತ್ತಾನೆ.

ಕಳೆದ ವರ್ಷಗಳಲ್ಲೆಲ್ಲಾ ಆತನು ನಮ್ಮ ಕೈಹಿಡಿದು ನಡೆಸಿದ್ದಾನೆ. ಆತನ ಕೈಯಿಂದ ನಮ್ಮನ್ನು ಕಸಿದುಕೊಳ್ಳುವವರು ಯಾರು? ಆತನ ಹಿಡಿತದಿಂದ ನಾವು ಜಾರಿಹೋಗುವಂತೆ ಮಾಡುವವರು ಯಾರು? ಆತನು ನಮ್ಮ ಕೈಹಿಡಿದಾಗ, ನಮ್ಮ ಹೃದಯಗಳಲ್ಲಿ ಸಮಾಧಾನ ಮತ್ತು ಪ್ರೋತ್ಸಾಹ ತುಂಬುತ್ತದೆ ಹಾಗೂ ನಮ್ಮ ಆತ್ಮಗಳಲ್ಲಿ ಆನಂದವುಕ್ಕುತ್ತದೆ.

ಅರಸನಾದ ದಾವೀದನು ತನ್ನ ಸ್ವಂತ ಅನುಭವದಿಂದ ಹೀಗೆ ಬರೆದಿದ್ದಾನೆ: “ನನ್ನ ಪ್ರಾಣವನ್ನು ಉಜ್ಜೀವಿಸಮಾಡಿ ತನ್ನ ಹೆಸರಿಗೆ ತಕ್ಕಂತೆ ನೀತಿಮಾರ್ಗದಲ್ಲಿ ನನ್ನನ್ನು ನಡಿಸುತ್ತಾನೆ (ಕೀರ್ತನೆ 23:3).

ಕರ್ತನ ಬಲಗೈ ನಿಮ್ಮನ್ನು ಹಿಡಿದಿದೆ ಎಂಬ ಸತ್ಯವನ್ನು ಅರ್ಥಮಾಡಿಕೊಳ್ಳಿರಿ. ಆತನು ಹೀಗೆ ವಾಗ್ದಾನ ಮಾಡುತ್ತಾನೆ: “ನೀನು ಜಲರಾಶಿಯನ್ನು ಹಾದುಹೋಗುವಾಗ ನಾನು ನಿನ್ನನ್ನು ವಿಮೋಚಿಸಿದೆನಲ್ಲಾ, ನಿನ್ನ ಹೆಸರು ಹಿಡಿದು ಕರೆದೆನಲ್ಲಾ; ನೀನು ನನ್ನವನೇ” (ಯೆಶಾಯ 43:2).

ಇಲ್ಲಿ ಕರ್ತನು ಕೇವಲ “ಕೈ” ಎಂದು ಹೇಳದೆ, “ಬಲಗೈ” ಎಂದು ಹೇಳಿದ್ದಾನೆ. ಎಡಗೈಗೆ ಹೋಲಿಸಿದರೆ ಬಲಗೈ ವಿಶೇಷವಾದುದು ಮತ್ತು ಶಕ್ತಿಯುತವಾದುದು. ವಿವಾಹದ ಸಮಯದಲ್ಲಿ, ವಧುವಿನ ಬಲಗೈಯನ್ನು ವರನ ಬಲಗೈಯೊಳಗೆ ಇರಿಸಲಾಗುತ್ತದೆ. ಕರ್ತನು ನಮ್ಮ ಆತ್ಮಗಳ ವರನಾಗಿದ್ದಾನೆ ಮತ್ತು ಆತನು ತನ್ನ ಬಲಗೈಯಿಂದ ನಮ್ಮನ್ನು ಹಿಡಿದಿದ್ದಾನೆ.

ಯೇಸು ಕ್ರಿಸ್ತನು ಪುನರುತ್ಥಾನಗೊಂಡು ಪರಲೋಕಕ್ಕೆ ಏರಿಹೋದಾಗ, ಆತನು ತಂದೆಯ ಎಡಭಾಗದಲ್ಲಿ ಕುಳಿತುಕೊಳ್ಳಲಿಲ್ಲ, ಬದಲಾಗಿ ಬಲಭಾಗದಲ್ಲಿ ಕುಳಿತುಕೊಂಡನು. ಅದೇ ರೀತಿ, ನಾವು ಜಯಶಾಲಿಗಳಾಗಿ ಪರಲೋಕ ರಾಜ್ಯವನ್ನು ಪ್ರವೇಶಿಸಿದಾಗ, ನಾವೂ ಸಹ ಕ್ರಿಸ್ತನೊಂದಿಗೆ ಮಹಿಮೆಯಲ್ಲಿ ಕುಳಿತುಕೊಳ್ಳುವೆವು.

ಕರ್ತನು ಹೇಳುತ್ತಾನೆ: “ನಾನು ಜಯಹೊಂದಿ ನನ್ನ ತಂದೆಯೊಡನೆ ಸಿಂಹಾಸನದಲ್ಲಿ ಕೂತುಕೊಂಡೆನು; ಹಾಗೆಯೇ ಜಯಹೊಂದುವವನನ್ನು ನನ್ನೋಡನೆ ಸಿಂಹಾಸನದಲ್ಲಿ ಕೂತುಕೊಳ್ಳುವಂತೆ ಮಾಡುವೆನು” (ಪ್ರಕಟನೆ 3:21).

ಕರ್ತನ ಕೈ ಬಲವಾದ ಕೈಯಾಗಿದೆ. ಅದು ತಕ್ಕ ಕಾಲದಲ್ಲಿ ನಿಮ್ಮನ್ನು ಮೇಲೆತ್ತುವ ಕೈಯಾಗಿದೆ. ಆದ್ದರಿಂದ, ಯಾವಾಗಲೂ ಆತನ ಶಕ್ತಿಯುಳ್ಳ ಕೈ ಕೆಳಗೆ ಇರುವಿರಿ. ಪ್ರತಿದಿನ ಮತ್ತು ಪ್ರತಿಯೊಂದು ಸನ್ನಿವೇಶದಲ್ಲೂ ನಮ್ಮನ್ನು ರಕ್ಷಿಸುವ ಆ ಶಕ್ತಿಯುತ ಕೈಗಳೊಳಗೆ ನಾವು ವಿಶ್ರಮಿಸೋಣ. ಆಗ ಯಾವ ಕೆಡುಕು ನಮ್ಮ ಹತ್ತಿರ ಸುಳಿಯದು.

ಕರ್ತನು ಮತ್ತೆ ಹೇಳುತ್ತಾನೆ: “ನಾನೇ ನಿನ್ನೊಂದಿಗಿದ್ದೇನೆ; ದಿಗ್ಭ್ರಮೆಗೊಳ್ಳದಿರು, ನಾನೇ ನಿನ್ನ ದೇವರು; ನಾನು ನಿನ್ನನ್ನು ಬಲಪಡಿಸುತ್ತೇನೆ; ಹೌದು ನನ್ನ ಧರ್ಮದ ಬಲಗೈಯನ್ನು ನಿನಗೆ ಆಧಾರಮಾಡುತ್ತೇನೆ” (ಯೆಶಾಯ 41:10).

ಪ್ರಿಯ ದೇವರ ಮಕ್ಕಳೇ, ಕಷ್ಟದ ಸಮಯದಲ್ಲಿ ನಾವು ಆತನಿಗೆ ಮೊರೆಯಿಟ್ಟಾಗಲೆಲ್ಲಾ, ಆತನು ತನ್ನ ಕೈ ಚಾಚಿ ನಮ್ಮನ್ನು ಮತ್ತೆ ಮೇಲೆತ್ತಿಲ್ಲವೇ?

ಮುಂದಿನ ಅಧ್ಯಾಯನಕ್ಕಾಗಿ ದೇವರ ವಾಕ್ಯ: ” ಇಗೋ, ನನ್ನ ಅಂಗೈಗಳಲ್ಲಿ ನಿನ್ನನ್ನು ಚಿತ್ರಿಸಿದ್ದೇನೆ; ನಿನ್ನ ಪೌಳಿಗೋಡೆಗಳು ಸದಾ ನನ್ನ ಕಣ್ಣೆದುರಿನಲ್ಲಿವೆ.” (ಯೆಶಾ 49:16)