Aug 28 – Lulunan do Daneben!

“Iten asan gamlenden GAMANG Kitung-ben d’ong-ben ayengan a lulunan do a danen tiybenten, amben nami sikkoi ja endrang a gane” (Bagujuanaber 12:9).

Kristu mandrengna aboi mandrengna handrangan, do yarnabented. Ogandiba, baruban bo karan yirte. Bogad kun karan geran orde itejan delenden, kun karan kadabten do yersamte, bo surda tanagadan janang dete. Kan ambrij Kristu mandrengna janang, yarnabented, itendelenjanang. Buteja a dirnanji saring adyarneji do dirna ahanagodanji saring adayergudneji.

Angante Kitungan Lot a d’ong a birindan urunglai Sodom saring, Anin gamle: “Kandungbaben agijgijdong orde atanangdong ongajangan adiydiy manengban ja. Baruban yirban, itjalinden amben sidtaben.” Bindo Lot adukarin er manelebe daiyergudneten, anin gadile aboi basud-sunan. Kan batte galamtabe daiyegunan batte kanalkalan.

Angante amben ayirte, Kitungan mukkababen dakute, Kitungan abadlohim maranji janang do ruangan arajan janang. Bindo bogad amben adaiyegudlinanden, sonuman do akuduaihji do amangba galutaben.

Anappai Pol idolle itente kandungbaben antate eraihmlabe itente mukkababen kun abmele ahimle abrijnaben dete. U’u, Kristu mandrengna, ateng janabanji akaridaben dete, kun ate kandungbaben aumdrengben detena. A papwranji ate karidaben detena, itente mandrenganben adelen ate pintunji karidaben dete na. Kan ambrij ayam-lingan, itente mukkababen daku kunina amanengba arduben dete – Kitunglen Kristun a manaridban.

Ganarberan amandrengnaba do Kitungdage amandrengnaban, do saile adakunaben dete. Eteden kun batte amben gudinle adrabtite Kristun Jisun a d’ong Kitungan sandle. Amben ardulai atankudban, do kana yam amben adaiyegudnaben ted. Marid Janggardan do Anin ayirtaih abmele, ambendaman abriynaben dete arduben asan uyulkuijan ahangben abmele.

Atanakudban, amben bagu trading abmele adeben dete do janabanji ahangben asan abrijnaben dete. Tanahimdam Kitungan a onagji, j’eben Kitungan ayirtaih abmele asaiben dete. Amben ardulai atankudban, do kana yam amben adaiyegudnaben ted. Daina batte abrijna arengben dete. Amben tangsoi atnangben dete anappai Pol batte kan ambrij: “Hen hanglai bo bangsa sanu abmele, Hen tabkudlai abrijna, Hen dirlenai”. Ateng asan, abrijnaba do hangban itente mukkababen daku (Anabpunggi 14:11).

Okiy Kinolbe absele: “Jordon a darungyungsengban ayengan a desan Mojes d’ong-ben tiyeten, tetten dukri-benji, passij- benji do jontu-benji kan jordan a mittal dakuneteji. Bindo amben do barij radu bro mar-benji sanu handramanji hamle, birinda kulam buhang-benji a d’ong a saiyamben asan a mukkabanji abmanglen Jordon padle a yerte” (Josua 1:14-15).