Feb 14 – Kukajalem-taran!

“Ebbanji amang lingan aboi  kukajalem-taran engale, insalonji amang lingan langgiboi-hen ettele” (Solomon a Kanen 2:2).

Kukajalem-taran ajar ajar tarbanji saring kan ate aboi murdadage taran. Angante tarban galute galji orde bokurdi fit asagai dakute. Bindo Kukajalem taran etilete, atengan sagai janang rangen batte ardute.

Bo mandran dakule ayengan a mandra bo surda baran batte lumle dakule kuddub-lingan, itente Kristumaranji dirnna-lingan lumteji. Anin aboi garber ompun dakule. Kan a ompun gorment rabangle, a d’ongan hamle gails’ing-lingan arledba dakuleji, anin a d’ong ateng abkalkalleji kan ambrij anin dakule. Kun ayam, kun buhangan Kitungan amanglen batturlen dakule do garberneten aur abmang saring garberlen dakule.

Engale anin garberlen, kun korojosing-lingan Kitungan atanurdun barij dele. Anin amukan puangle oante oante yirle Kitungan a Janggardan barij dele do bigarda langlanganji batte birlen, Kitungan a tanurduling. A garberan batte kuddub korojosingba ardule dane maran amangban sikoija. Kitungdage aranaptin batte, gorment-janang a d’ongan bayale urleji barodisingan saring. Do angante a d’ongan umdrengleji, anin ayernaiten adnang ajar ajar amandranji Kitungan amangba urungaiten amang saring aur, do anin aboi ranan do ridin ambrij Kitungan abmele dakule.

Ateng tarabanji daku, Kitungan gadlamlangten bagu bernan batte kan tarbanji: tarban gulapetaran ambrij dinna-lingan, do orublingan, Kukajalem ambrij. Kun ambrij, Jisun ahangna maran bagu ompu-lingan danakun delenden. Aboi ate, denna-lingan sattan sandunteji. Do anab-bagu ate, loile asandungteji amandranji a d’ong gadlamte.

Kuddub milgal hanangna maranji, kun Kitungan batte sanedan adele ate dinna-lingan asadungleji, do bo gulape taran ambrij radu dakule. Kun ayam-lingan janang loile dirnan-lingan adakuleji amandranji dakule, engale Nikodimos do Josep Arimathea saring, Kukaijaleman ambrij dakuleji.

Nami janang Kitungan asarebasingba, bagu ompun ambrij. Aboi ate agijtate aranakun. Anab-bagu ate asoso orde loile aranukun, kan ate aboi dane maranji batte adakute ate, mailen adakutenanji amandranji ambrij. Kan ambrij arankunji dakute, iten dakuleja orde aboi saruman ambrij Kukaijaleman tarban ambrij, Kitungan abmele. Tanahimdam Kitungan a onagji, amben aboi ragal dakuben dete Kitungan abmele, bagun mandrengnaben do asoso mandrengna b igardaji saring.

Okiy Kinolbe absele: “Lua nebanji a j’on a g’urben asan susute; drakiya lanamanji a bunderda a sanaruman harte. E tanimyimboi-hen, dzna yerai; e langgiboi-hen, hen ampara yerai” (Solomon a Kanen 2:13).