Sep 21 – HEN KAN ATE JALLEM ABMETAI!

“Hen na mukkaba-nam abmang abmanglen yerte do jabjab darakunanji jallem abmetai; ridi sananganji abaldingle abrarditai, do luang arakarda-danganji raijle szdtai” (Jisaiya 45:2).

Nami akznolanji batte Kitungan absittalangte. Aparamangtan, Anin gamaite Hen na mukkaba-nam abmang abmanle yerte, do anab-bagu-ling anabsita barna kan ate anin darakunanji jallem abmete. Titi-lingan pede jajzngante anabkalkalan dakute mandrengna-ling-ben, jabjab do er gadele. Titi maina orde jabjabloge atangoran dakute. Yangam jabjab orde er gadele dakule kun ayam? Kan angante mandranji amben abmele kani kuni gamle kudi kota birlinji, bigrdanji amang, kani ate amang-linganji amben abmele aboi jabjab orde dusamar deleben.

Banirdung-manahang maranji do ganimad-maranji, anin kuddub ayam-ling bigrdanji abmele danusa saile dakutenji. Bigrda-bigrda ayam-ling, amben agaja pangle adraptie itenti aninji aj’ee-linganji aboi danusan adelen ate. ambendama kun ate sabrile adraptie. Bindo nami Kitungan gamlangten Hen na mukkaba-nam abmangten do jabjab darakunanamji jallem abmetai gamte.

Kitungle ayengan a Kitung kuddub mandrengna-ling-len adaku ate sabrite. Bibolan gamte: “Tangoran rzlen a mandra aninji a mukkaban abmangle yerte; aninji a garan-gan sanangan rzle, baiyeran dunglen yerteji. Aninji a rajan aninji a mukkaban abmang abmanglen yerte, Gamangtungan aninji a d’ong abanjengte” (Mika 2:13).

Angante Kitungan abmang-ling yerte, jabjabanji, er-roitandanji, langkajaitanji do ersabrinji kuddub Anin sabrite. Birinda-lingan pede ateng kanalkalanji daku, enogoi akanalkalanji koinan do knaran batte dakute, do kani na ate aboi er sanabyun pangtai mandrengna-lingan. Bindo angante amben agobte Kitungan ajingba do agadlamte: “Kitung, mandrengna-ling-hen akanalkalanji abasuyem gamle gijgijai, do yangam ranoitad-hen dayerle. Aman-na mahai ordaran abitsarate, do amana maihai sattang kanalkal-henji sangaite. Kitung, abasuyem gamle mukkaba-hen abmangna do kuddub tangor-henji jallemma”. Do angante amben agarberten Kitungan amang-ling, Anin kuddub sabrite mandrengna-ling-ben.

Jujulenji, anin garber-ling dakulenji. Togalan ayam-ling endrang maine a buhangan Esun, kun togal-lingan Kitungan amangba garber-ling dakun nete. Do agarberan batte, a buhangan man’oihan batte jaeten, ayeraiten adena-ling. Kuddub arberanji do anasanganji amng-linganji saring abaldungle, tabme sanabyun, tabme bunuhangan do gardin ambrij abmele. U’u, kan ate Kitungan na lumle. Tanahimdam Kitungan a onagji, nami kun ambrij Kitungan alumben yerte mang-ling-ben.

Okiy Kinolbe absele: “Hen aninji a mukkaban a lanungudan adpuangtai do jabjab darakunan jalem abmetai. Kani a baranji lumle aninji a d’ong Hen adnumdrengai” (Jisaya 42:16).