ਨਵੰਬਰ 11 – ਜੀਵਨ ਦੀ ਰੌਸ਼ਨੀ!

“ਉਸ ਵਿੱਚ ਜੀਵਨ ਸੀ, ਅਤੇ ਉਹ ਜੀਵਨ ਇਨਸਾਨ ਲਈ ਚਾਨਣ ਸੀ। ਉਹ ਚਾਨਣ ਹਨੇਰੇ ਵਿੱਚ ਚਮਕਦਾ ਹੈ, ਹਨੇਰੇ ਨੇ ਇਸ ਨੂੰ ਕਬੂਲ ਨਹੀਂ ਕੀਤਾ”(ਯੂਹੰਨਾ ਦੀ ਇੰਜੀਲ 1:4,5)।

ਸਾਡਾ ਪ੍ਰਭੂ ਯਿਸੂ ਜੀਵਨ ਦੀ ਰੌਸ਼ਨੀ ਹੈ। ਉਹ ਹਰ ਦਿਲ ਵਿੱਚ ਉਸ ਸਵਰਗੀ ਰੋਸ਼ਨੀ ਨੂੰ ਜਗਾਉਣ ਦੇ ਲਈ ਧਰਤੀ ਉੱਤੇ ਉਤਰ ਆਇਆ ਜਿਹੜਾ ਉਸ ਅੱਗੇ ਪ੍ਰਾਰਥਨਾ ਕਰਦਾ ਹੈ ਕਿ ਉਹ ਉਸ ਦੇ ਜੀਵਨ ਵਿੱਚੋਂ ਹਨੇਰੇ ਨੂੰ ਬਦਲ ਦੇਵੇ ਅਤੇ ਉਸ ਦੀ ਰੋਸ਼ਨੀ – ਜੀਵਨ ਦੀ ਰੋਸ਼ਨੀ ਨੂੰ ਚਮਕਾ ਦੇਵੇ। ਪ੍ਰਭੂ ਯਿਸੂ ਜੀਵਨ ਦੀ ਉਹ ਰੋਸ਼ਨੀ ਪ੍ਰਦਾਨ ਕਰ ਸਕਦਾ ਹੈ, ਭਾਵੇਂ ਇਹ ਦਿਲ ਦਾ ਹਨੇਰਾ ਹੋਵੇ, ਜਾਂ ਪਾਪੀ ਜੀਵਨ ਦਾ ਕਾਲਾ ਪਰਛਾਵਾਂ ਹੋਵੇ।

ਭਾਵੇਂ ਕੋਈ ਗਰੀਬ ਹੋਵੇ ਜਾਂ ਅਮੀਰ, ਸਮਾਜਿਕ ਰੁਤਬੇ ਜਾਂ ਸਿੱਖਿਆ ਦੇ ਪੱਧਰ ਦੀ ਪਰਵਾਹ ਕੀਤੇ ਬਿਨਾਂ; ਜੇਕਰ ਉਹ ਮਸੀਹ ਨੂੰ ਆਪਣੇ ਦਿਲ ਵਿੱਚ ਸਵੀਕਾਰ ਕਰਦਾ ਹੈ, ਅਤੇ ਮਸੀਹ ਵਿੱਚ ਆਪਣਾ ਵਿਸ਼ਵਾਸ ਰੱਖਦਾ ਹੈ, ਤਾਂ ਪ੍ਰਭੂ ਜ਼ਰੂਰ ਹੀ ਉਸ ਉੱਤੇ ਜੀਵਨ ਦੀ ਰੋਸ਼ਨੀ ਚਮਕਾਏਗਾ।

ਪਵਿੱਤਰ ਸ਼ਾਸਤਰ ਕਹਿੰਦਾ ਹੈ: “ਅਸਲ ਚਾਨਣ ਦੁਨੀਆਂ ਵਿੱਚ ਆਉਣ ਵਾਲਾ ਸੀ। ਇਹ ਅਸਲ ਚਾਨਣ ਸੀ ਜੋ ਸਾਰੇ ਮਨੁੱਖਾਂ ਨੂੰ ਰੋਸ਼ਨੀ ਦਿੰਦਾ ਹੈ”(ਯੂਹੰਨਾ ਦੀ ਇੰਜੀਲ 1:9)।

ਰਸੂਲ ਪੌਲੁਸ ਨੇ ਆਪਣੇ ਆਪ ਨੂੰ ਪ੍ਰਭੂ ਯਿਸੂ ਦੀ ਸੇਵਾ ਵਿੱਚ ਸਮਰਪਿਤ ਕੀਤਾ – ਜਿਸਦੇ ਕੋਲ ਕਿਸੇ ਵੀ ਵਿਅਕਤੀ ਨੂੰ ਬਦਲਣ ਅਤੇ ਸੰਪੂਰਨ ਕਰਨ ਦੀ ਸ਼ਕਤੀ ਹੈ। ਉਹ ਘੋਸ਼ਣਾ ਕਰਦਾ ਹੈ: “ਜਿਸ ਦੀ ਅਸੀਂ ਖ਼ਬਰ ਦਿੰਦੇ ਹਾਂ ਅਤੇ ਹਰੇਕ ਮਨੁੱਖ ਨੂੰ ਸੁਚੇਤ ਕਰਦੇ ਅਤੇ ਹਰੇਕ ਮਨੁੱਖ ਨੂੰ ਪੂਰੇ ਗਿਆਨ ਨਾਲ ਉਪਦੇਸ਼ ਦਿੰਦੇ ਹਾਂ ਕਿ ਅਸੀਂ ਹਰੇਕ ਮਨੁੱਖ ਨੂੰ ਮਸੀਹ ਵਿੱਚ ਸਿੱਧ ਕਰ ਕੇ ਪੇਸ਼ ਕਰੀਏ”(ਕੁਲੁੱਸੀਆਂ 1:28)।

ਪ੍ਰਮੇਸ਼ਵਰ ਦੇ ਬੱਚਿਓ, ਜਦੋਂ ਤੁਸੀਂ ਪ੍ਰਭੂ ਯਿਸੂ ਵਿੱਚ ਵਿਸ਼ਵਾਸ ਕਰਦੇ ਹੋ ਅਤੇ ਉਸਨੂੰ ਆਪਣੇ ਪ੍ਰਭੂ ਅਤੇ ਮੁਕਤੀਦਾਤਾ ਵਜੋਂ ਸਵੀਕਾਰ ਕਰਦੇ ਹੋ, ਤਾਂ ਜੀਵਨ ਦੀ ਰੋਸ਼ਨੀ ਜਿਹੜੀ ਤੁਹਾਡੇ ਵਿੱਚ ਜਗਦੀ ਹੈ, ਚਮਕਦੀ ਰਹਿੰਦੀ ਹੈ। ਤੁਹਾਨੂੰ ਪ੍ਰਭੂ ਦੇ ਵਾਪਸ ਆਉਣ ਤੱਕ ਉਸ ਰੌਸ਼ਨੀ ਨਾਲ ਚਮਕਦੇ ਰਹਿਣਾ ਚਾਹੀਦਾ ਹੈ। ਉਸ ਰੋਸ਼ਨੀ ਦੇ ਲਈ ਜਿਹੜੀ ਤੁਹਾਡੇ ਮਨ ਦੀ ਆਤਮਾ ਵਿੱਚ  ਪ੍ਰਕਾਸ਼ਮਾਨ ਹੈ, ਜਗਦੀ ਅਤੇ ਚਮਕਦੀ ਰਹਿੰਦੀ ਹੈ; ਤੁਹਾਨੂੰ ਆਪਣੀ ਆਤਮਾ ਵਿੱਚ ਪ੍ਰਭੂ ਦੇ ਨਾਲ ਲਗਾਤਾਰ ਸੰਗਤੀ ਵਿੱਚ ਰਹਿਣਾ ਚਾਹੀਦਾ ਹੈ।

ਜਦੋਂ ਪ੍ਰਮੇਸ਼ਵਰ ਨੇ ਮਨੁੱਖ ਨੂੰ ਬਣਾਇਆ, ਤਾਂ ਉਸਨੇ ਮਨੁੱਖ ਨੂੰ ਆਪਣੇ ਸਰੂਪ ਅਤੇ ਸਮਾਨਤਾ ਵਿੱਚ ਬਣਾਇਆ। ਹੁਣ, ਪ੍ਰਮੇਸ਼ਵਰ ਦਾ ਸਰੂਪ ਕੀ ਹੈ? ਉਸਦੀ ਤਸਵੀਰ ਅਤੇ ਸਮਾਨਤਾ ਕੀ ਹੋਵੇਗੀ? ਭਾਵੇਂ ਹੀ ਅਸੀਂ ਇਸਦਾ ਵਰਣਨ ਕਰਨ ਦੇ ਯੋਗ ਨਹੀਂ ਹਾਂ, ਅਸੀਂ ਨਿਸ਼ਚਤ ਤੌਰ ਤੇ ਜਾਣਦੇ ਹਾਂ ਕਿ ਪਰਮੇਸ਼ੁਰ ਆਤਮਾ ਹੈ। ਜਦੋਂ ਉਸਨੇ ਮਨੁੱਖ ਨੂੰ ਜ਼ਮੀਨ ਦੀ ਮਿੱਟੀ ਤੋਂ ਬਣਾਇਆ, ਅਤੇ ਉਸ ਵਿੱਚ ਜੀਵਨ ਦਾ ਸਾਹ ਫੂਕਿਆ ਅਤੇ ਆਪਣੀ ਆਤਮਾ ਨੂੰ ਉਸ ਵਿੱਚ ਪਾਇਆ। ਇਸ ਲਈ ਪਵਿੱਤਰ ਸ਼ਾਸਤਰ ਕਹਿੰਦਾ ਹੈ: “ਮਨੁੱਖ ਦਾ ਆਤਮਾ ਯਹੋਵਾਹ ਦਾ ਦੀਵਾ ਹੈ, ਜਿਹੜਾ ਸਾਰੇ ਅੰਦਰਲੇ ਹਿੱਸਿਆਂ ਨੂੰ ਖੋਜ਼ਦਾ ਹੈ”(ਕਹਾਉਤਾਂ 20:27)।

ਜੇਕਰ ਤੁਹਾਡੇ ਦੀਵੇ ਨੇ ਲਗਾਤਾਰ ਜਗਣਾ ਹੈ, ਤਾਂ ਤੁਹਾਨੂੰ ਆਤਮਾ ਅਤੇ ਸਚਿਆਈ ਨਾਲ ਪ੍ਰਭੂ ਦੀ ਆਰਾਧਨਾ ਕਰਨੀ ਚਾਹੀਦੀ ਹੈ। ਪ੍ਰਭੂ ਯਿਸੂ ਨੇ ਕਿਹਾ: “ਉਹ ਸਮਾਂ ਆ ਰਿਹਾ ਹੈ, ਜਦੋਂ ਸੱਚੇ ਉਪਾਸਕ ਆਤਮਾ ਅਤੇ ਸਚਿਆਈ ਨਾਲ ਪਿਤਾ ਦੀ ਬੰਦਗੀ ਕਰਨਗੇ। ਉਹ ਸਮਾਂ ਆਣ ਪੁੱਜਾ ਹੈ। ਪਰਮੇਸ਼ੁਰ ਅਜਿਹੇ ਅਰਾਧਕਾਂ ਨੂੰ ਲੱਭ ਰਿਹਾ ਹੈ। ਪਰਮੇਸ਼ੁਰ ਆਤਮਾ ਹੈ, ਇਸ ਲਈ ਜੋ ਲੋਕ ਪਰਮੇਸ਼ੁਰ ਦੀ ਬੰਦਗੀ ਕਰਦੇ ਹਨ ਉਨ੍ਹਾਂ ਨੂੰ ਉਸ ਦੀ ਆਤਮਾ ਅਤੇ ਸਚਿਆਈ ਨਾਲ ਬੰਦਗੀ ਕਰਨੀ ਚਾਹੀਦੀ ਹੈ”(ਯੂਹੰਨਾ ਦੀ ਇੰਜੀਲ 4:23,24)।

ਪਰਮੇਸ਼ੁਰ ਦੇ ਬੱਚਿਓ, ਸਾਡੇ ਪ੍ਰਭੂ ਨੇ ਐਲਾਨ ਕੀਤਾ: “ਮੈਂ ਸੰਸਾਰ ਦਾ ਚਾਨਣ ਹਾਂ। ਉਹ ਮਨੁੱਖ ਜੋ ਮੇਰੇ ਪਿੱਛੇ ਚੱਲਦਾ, ਉਹ ਕਦੇ ਵੀ ਹਨੇਰੇ ਵਿੱਚ ਨਹੀਂ ਜੀਵੇਗਾ ਸਗੋਂ ਉਸ ਕੋਲ ਜੀਵਨ ਦਾ ਚਾਨਣ ਹੋਵੇਗਾ”(ਯੂਹੰਨਾ ਦੀ ਇੰਜੀਲ 8:12)। ਇਸ ਲਈ, ਅੱਜ ਹੀ ਪ੍ਰਭੂ ਦੇ ਕੋਲ ਆਓ, ਜਿਹੜਾ ਤੁਹਾਡੇ ਜੀਵਨ ਦੀ ਰੌਸ਼ਨੀ ਹੈ।

ਅਭਿਆਸ ਕਰਨ ਲਈ – “ਕਿਉਂ ਜੋ ਹੁਕਮ ਦੀਵਾ, ਸਿੱਖਿਆ ਜੋਤ, ਅਤੇ ਸਿਖਾਉਣ ਵਾਲੇ ਦੀ ਤਾੜ ਜੀਵਨ ਦਾ ਰਾਹ ਹੈ”(ਕਹਾਉਤਾਂ 6:23)।