Sep 28 – CHUTU SHIYAL KHAN!

Song of Solomon 2:15 “dhure ami khan ke shiyal khan pora, chutu shiyal khan junntu biya kore lota khan ke”.

Apuni khan khali hoshiyar nahobo lage dangor shiyal khan pora hoilebi chutu shiyal khan pora bi. Itu matlab ki apuni saman hi hoshiyar thakibo lage chutu galti khan tebi, jinika apuni khan dangor paap khan te thake apuni laga jibon te. Judi apuni nasai ekta chutu machar ke,  tini hoile apuni khan malaria laga bukhar bhugi bo lagibo. Jun khan bachai lota khan ke tai khan bishi hoshiyar thake ahibo nadibole iku janwar khan bi. Hoilebi chutu shiyal khan ini ghusi bole pare, mati khundi kene himina laga niche te.

Kun bi nadikhibo tai ghusa aru ulai ja laga. Aru ekbar ghusi le lota laga bagan te, tai pora biya koribo phul khan ke aru koli angur khan ke. Inika kori kene biya kori dibo pura  bagan ke, aru utu gash laga lota khan ke khai dibo. Itu karone pobitro kotha te koi ami khan ke dhuribole chutu shiyal khan ke juntu biya kore lota khan ke.

Itya, ami khan sabo chutu shiyal khan ke juntu biya kore ami khan laga atma laga jibon ke.

1.Komti biswas  te: Isor icha kore ami khan ke biswas koribole Tai laga kotha khan te, chutu bacha khan nishina. Kilekoile pahar khan bi hilai diye biswas  pora (Mark 11:23)

2.Borbor kora: Israel manu khan sob khotom hoishe utu kosom diya laga mati te, kilkoile tai khan narukhi kene bokbok kora karone. Bokbok kora tu hoile Isor bishi biya pai. Itu khan hi chutu shiyal khan ase juntu pora biya kore atma laga jibon ke.

3.Chinta: satan chalak pora ane chinta khan apuni laga mon te. Hoilebi jun khan bbiswas kore Romans 8:28 te kitya bi chinta nakore. Itu podh te koi: “aru ami khan jane ki sob saman khan kaam kore eki logote bhal karone tai khan karone  jun khan morom kore Isor ke, tai khan jun khan ke  matishe Tai laga uddesh karone” (Romans 8:28).

4.Misa mishi kotha: “itu iman bishi kotha khan laga majete pap tu komti nahoi” (Proverbs 10:19. Misa mishi kotha pora loi jabo apuni ke paap te.

5.Kom santushti: jun khan santusht nathake, aru un khan khushi nathake sob stithi te, tai khan khotom koribo nijor laga atma laga jibon ke.

6.Prithibi laga bhar: bishi manu khan ase jun khan dibole napare tai khan laga bhar ke Isor te aru loi nijor uporte. Itu karone,tai khan uthibole napare atma laga jibon te.

7.Laparvahi: bishi ase jun khan koi ki tai khan morom kore Isor ke, hoilebi bahana loi kene ahe ki tai khan prathana koribole homoi nai nahoile bi puribole pobitro kotha ke, nahoilebi Girja laga karyakram  te thakibole. Isor laga bacha khan,  kitya bi napahoribi ki inika bahana khan iku nahoi hoilebi chutu shiyal khan ase ji pora biya kore apuni laga atma laga jibon ke.

Aji bhabna koribole laga pobitro kotha tu hoile Hebrews 12:1-2 “itu karone, ami khan  rakhibo sob bhar khan ke, aru pap ke juntu ahram por ami khan ke bhoi khilai, aru ahi ami khan polabo dhairya logote juntu ami khan laga agete rakhi kene ase, sai kene Jisu ke, utu lekhak aru hekh kora ami khan laga biswas laga” .