Sep 19 – Garupa Jannongan a Murkundardanji!

“Gamangtungan na Kitungan kan ate galamba; Anin d’ong-len gabdelle, anlendaman ijja; anlen Anin a mandranji, anlen Anin a garupa jannongan a murkundardanji” (Sanenken 100:3).

Bo dinna amben duhin-duaige adelen amarandan. Do d’ongben anurungan delaben aboi mananedam murkundarngan gamle. Amben akadabdongne kan batte, bindo amben agupanaben dete bo janumjuman ahangte sikoija Kitungan a murkundardangan ambrij.

J’eben aboi bangsa jannongan abmele. Daudo gamle, “Anin d’ong-hen ledenggab lingan abtabmutih; Anin lagad hana d’an adam adamban d’ong-hen urungtih” (Sanenken 23:2). Anangte gupamar abhanate a murkundarnganji, garupaban gudingle. Anin galamte oan aparamang aguben dete gamle. Do murkurdarnganji arjabteji man’oihan batte ardutenji atiki.

Bangsa agaban aboi Kitungan a berna gadlamte do ahananhangan. Kan ambrij adnang anin gamte, “Mandran rutipun tum batte abm’engte, bindo Kitungan a t’od saring a dunglen a dile bernan batte m’engte” “Hanang-henji dobdab-gwman ambrij galuete, do berna-hen kasiradan ambrij de-ete. Berna-henji lamtin-gwman ambrij ledeng uabanji a langka galuete, do sirpij-gwman ambrij ledeng gabanji a langka galuete” (Bagujuanaber 32:2).

Amben bo berna andangle pedde Tenali Raman. Bo dinna Rajan, ranan tiyle do ualle dinna do Arabik gurda. Bindo kuddub Tenali Raman a ningad dakule lanumudan a s’inglen, do asar ollan battte tiyjumleji. A m’engted, gurda asarle. Kan a berna rajan amdangle, amelgijben abmele aboi montri appaile. Angante montrin kun darakunaban yireten asar agaban ate gijle.

Kun ambrij, adnisumeji amandranji, alumud-lingan dakutenji do er bangsa januman tiyjumteji, er bangsa hananghangan do jolda kan ambrij abanudin, angante mandranji itente a d’onganji hangdrangdage. Bindo Daudo, galamle Kitungan a bernan, do dile togal tamba tiyj’elen dakulen. Kun asan anin gamle Kitungan a d’ong absuile do m’oihnaba: “Kitungan ombungnaben asan bangsa agaban dakule”.

Tanahimdam Kitungan a onagji, Kitungan aitsuman kan ate anlen amarangben dete kuddub-lingan d’ong-lingan, engale pwrardalen.

Okiy Kinolbe absele: “Bar GAMANGtungan tordong apsuigod mar-ben dete, do asarsol darakuna linganji pwrarda-ben sadyimte, bar j’ang-benji rabdute; seletten amben ranudang kuttan ambrij detaben, do amben er ahad dungdamdan ambrij detaben” (Jisaiya 58:11).