Sep 17 – Sanu Kurtanji!

“Iten asan gamlenden kuduai kuduaianji a Gamangtungan, Juda birindan, manan, Anin a marandan a d’ong gupate, bar sanu lingan ranaptidage sanu kurtanji ambrij abmete” (Jikoriya 10:3).

Kitungan d’ongben melgijte do sanu lingan ranaptidage sanu kurtanji ambrij abmetaben. Anin janang rabdutaben. Amben agalamtepo kurtan abmele sanu-lingan? Kitungan abpunggele kun abmele, ayob amangba.

Kitungan gamle, “Aman kurtan a d’ong a ranaptin tiyte po? Aman anin a sangka lingan barij uppuran bolodte po? Aman anin a d’ong papparan ambrij a zrjabben asan tiyte po? Anin a m’un a tanongyiman bantongidage. Anin tamlung basseng lingan padrijte do anindaman a ranapti lingan m’oihten; anin anoskai sanu maranji a d’ong a rabangben asan yerte. Anin puyingte do bantongidage adde-e, do anin kardiban a mukkaban saring daiyarre adyerre. Darakku-a’aman, szllan, do uddardan anin a kandung lingan rzngrangloge saddate.

Hanamangan  Anin do banandraban batte labon mole szdte, do sanu surakompedan a sanaddan batte anin rznglen attanange. Dajing tara surakompedan saddate, dijte tara anin, A a, gamte. Bar anin sangai saring sanun anangnuran angnurte, do sanu oba maranji a ganarwman do sanu uai-sarrangan amdangte” (Ayob 39:19-25).

Amben sanu kurtan adetepo? Eteden amben kuddub danukaben Kitungan amangban a surpidben dete do a dirdirnaben dete. Kitungan ranaptidam, er-t’ul hangdraman saring bo radu sanu mar abmetaben. Amben abantongben dete itente mukababen daku. Angante danuka yirtai do d’ongben abdukate, amben a m’oihnaben dete bo dainan batte. Amben dainan a hangte asanggem-marbenji saring, do dile kanalkal-lingan atanangben dete. D’ongben agaja adnab-s’ideji. Do sanu lingan amben aboi ranaptidam sanu kurtan adete.

Bogad amben a sanu-lenanden, kan ate jznjzn murdadam a berna itente manane-beran abmele oblingte, itente bo hangdrangdage a kristumar mandrengna abhanate. Anappai Jakub Idolle: “Bar kurtan a t’od lingan danangkitam-langan dakkutabe, yante gamle aninji banaihber-lenji manneteji, bar aninji a barij d’ongan anlen abittabe” (Jakub 3:3). Iten ambrij anlen daku? Hangam abhanatenben orde iten ambrij daku?

Surpid-damnaba ambendaman, do banudin Kitungan a s’i-lingan daku, kun batte mandrengnaben abhanate. Kitungan a berna batten ahanataben do Anin ambrij abtangortaben.

Tanahimdam Kitungan a onagji, angante amben a surpid-damten sanu abmele Kitungan amangba, Anin kuddub bandate, Anin mukkababen yirte do abhanataben sanu lingan. Akaridadong Anin mukkababen a dakun ate, sanu lingan dainan abmele.

Okiy Kinolbe absele: “Sanun a dinnan abmele kurtan anoskaian dete, bindo dainan Gamangtunganate” (Bangsa Hanang 21:31).