Sep 07 – BHAVETIR BALAVNI

1 Pethru 2:20-21 Tham dosh karan marakhavajana, khamlatho vothi thamena kai motpan malacha?  Pan tham bhalayi  karan bhaveti padojana vona khamlatho vuj Dever khathar cha. Yervasaj tham balan cho, kimkatho Christhu sada thamarvas bhaveti padan, tham vor pager khojema chal javunu Kan thamar vas namuna chodgocha.

Vu Dev apanen pavithrethin  shaswith vagi rer mahimathin revasu balayocha. Ajji vela bhavetithi Khamen sada balayocha. Kassen katho apaner angaj Prabhu Yesu bhaveti padan, tham vor pager khojema chal javunu Kan thamar vas namuna chodgocha.

Prabhu Yesu Christhur vasu bhaveti padero kathra hacho nasheeb kunika. Vu Prabhun apan katho kathraiko prem vethi jethij varnana karer venijathra moto bhavetin khamlido, vor doi hathenan taangema kheeley marejanna marsaruj dheerethi khamlido Kan dekeja.

Aposthal Paul ajji Silas doyin loyer bonda ghalan taangena bhandnaken jailema ghalmelethoi vu bhavetinaj massaj khushithi khamlide jethi vo jailemaj hath maran geed bolan araadhana kide Kan dekacha. 2 Corinthivalun 1:6-7 Jethi ham bhaveti padathoi vu thamar samjavnir vasan rakshanar vaasaj, ham samjaalathoi vu sada thamar samjavnir vaasaj, ham bhaveti pareju thammi bhaveti padan khamlerejethi vu rakshana jor karacha. Tham hamar sath vela padoju, hamar sath samjavni haasovaal chokan ham malam karan thamar barema kaato bharoseval cha.

Chelavur sejir akharir jeevano massaj bhavetithi vethi. Aposthal Pethru hetvuncho vethanu siluva ghalayo. Markur hach khabaren lakkojako Marku Romama yek ghoder rathamen bhandnaken ghasaan ghasaan marnake. Mathai Ethiopia desema hatha shakshi vego. Thoma Bharath deshema hatha shakshi vego. Yakober mathen kaatnake. Aposthal Yohanen hacho balrijako thelema bheganake. Yesey bhaveti padethoi vunden Yesu Christhur prememathi cheti karer vikoni. Kassen katho vunden vunder balavni kaseek chako hachethi samajmelethey.

Romavalun 8:17-18  Apan beptavatho varisevaal, Dever varisevalan Christhur sath hassoval cha, Christhur sath apan Mahima payena vorsath bhaveti padathoi hanu vejaye. Jethi yee dadumar bhaveti, abbepar apaner dayi dakayer mahimana mojer veni kan keluchu.

Ajji jada dyan karen pado Aposthaler Kam 9:16 Vu mar namervadi kathraiko bhaveti padanu kajena, ma vona dakaluchu Kan ko.