Oct 21 – Tangjab Boi-hen!

“Kukkurboi-hen do tangjab boi-hen aboi satta daku” (Solomon a Kanen 6:9)

Moloi ajar mandranji Kitunglen a hanang amdangben lanangka baruban daileji. Moloi soa a mandranji ate Kitungdage a tanalmadan hangleji. Bo soa do bokurdi ate lanang-s’ingban ayengan amandranji dakuleji, Marid Janggarda a hangben. Yakurdi-galji ate Kitungan a baran abmele yirleji. Migal ate Janggardadage  a taniytiyan hangleji, ranaptin do dane. Yagi ate Kitungan batte, banandabwrban. Bindo Kitungan rabangle aboina ate Tangjabdam gamle do kun ate anappai Jon.

Kristu mandrengna-lingan barij baran alumben, Kitungan a tanimyimaran, sidrungmaran a pwrardaben. Kan a mandrengna-lingan, kan ate barij banangsadam a lulunaben abmele m’oihlen a tanimyim-lingan. Tanahimdam Kitungan a onagji, angante Kitungan d’ongben gijte, amben hadab po a gudingben ‘Kukkurboi-Hen, Tangjab boi-Hen’?

“A hanangna maranji amang saring bo mandra, manan, butente a d’ong Jisun timyimeten, anin Jisun a mayongban sardidgobeten” (Jon 13:23). Anin barijloge Kitungdage a tanimyiman dungle, do barijloge gudingle ‘Jisun timyimle a hanangna maran a d’ong’. Arakadangban kalobori-lingan, kuddub a hanangna maranji umdrengleji. Bindo Jon Kitungan adamban dakuneten a tanakudan sikoija. Do Jisun a yangan a d’ong Jon a s’i-lingan surpidle, gamle “Seletten anta hanangna maran a d’ong Anin gameten, Yang-nam gija. Kun ayaman saring anta hanangna maran a s’ingdamban anin a d’ong urungeten” (Jon 19:27).

Kun sattang ted. Iten asan gamlenden Jon amanglen rabangle tangjab do dirnnadage, Anin janang tiyle ruangan anabpungge anappai Pol amangba, angante anin patmosban dakule. Kan ate anappai Jon amang saring dele, anabpungge kamb’ol-lingan, anidolan dele. Amben janang a yirben dete Kitungan amang saring anabpungge do barij adeben abmele ruangan anabpungge!

Bibolan gamle: “GAMANGtungan a baruban buten rapti daite? Anin a marid darakuna lingan buten rapti tanangte? Ayengan a mandra a s’in do a uggaran marid do a j’en erszn a lumben asan addzne; orde joldale adjzbjzbe, anin na. GAMANGtungan anin a d’ong absittate; bar anin Anablu Kitungan saring anin ranoitadan hangte” (Sanenken 24:3-5).

Amben arabante tangjab gamle. Kitungan absuidamle Abraam amangban do gamle, “GAMANGtungan anin a d’ong apsui-damlen gameten, Hen Kuddub Ranapti Kitungan. Temang-ling-Hen roitad lanuman luman lumle roitad dea. Hen aman ampara anosai-Hen tabngijan tabngijle, d’ong-nam karran abawrtai” (Aparamantan 17:1-2). Amben janang a hanaben dete er dusadage kukkuran ambrij.

Kukkuran amangban iteja agasa anogalan. Banangsa-lingan dakuten arengban do dile gudingte edana sandrangan batte. Kukkuran ardule Kitungdage a bara-lingan. Marid Janggarda labsolai Kitungan Jisun amangban, Kukkuran ambrij. Nami Kitungan gudintaben aengben Kukkuran ambrij.

Okiy Kinolbe absele: “Tanimyim mar-hen d’ong-hen opungtih. E tanimyimboi-hen, dzna; e langgiboi-hen, hen ampara yerai” (Solomon a Kanen 2:10-11).