Oct 17 – Moloi Soa a Tanalmadan!

“Talaiba mar-benji ganumten gijteji do danggarda mar-benji tanalmadan gijteji” (Joel 2:28)

Onla maranji saring, moloi ajar mandranji sattamg adam dakuleji Jisu Kristun amangban do a bernan amdangben asan. Do kun moloi ajar amandranji, moloi soa sattang ate, Kitungan a tanalmadan gijleji. Amben arabangle po butten Kitungandage a tanalmadan hangleji?

Tanalmadan adakulenden, mandranji sangai yirteji do sanid-lingan sidteji. U’u, amben tanalmadan a hangben dete – garberan abmele, Kristun asan mandranji anablun abmele, baran do kudduban lanangkaban saring, Kitungdaman abmele. Sattangden, agarbertepo danukka j’en batte, bara-ling-ben banargutulan deben dete, ateng mandranji adyarj’enaben dete, do Kitungan atanurdu-lingan. Lanangkaban saring lanangkaban ayirben dete janggardadage a mandrengna-lingan, kun atanalmadan ahangben asan Kitungan a mang saring.

Tanalmadan Jisaiya ahangle ate bo surda tumadgijmar dele. Angante Raja Ujia kahidle, anin omdile Kitungan atanurdu-lingan do garberle abpunggeben butte dete ayirtaih ayam a Raja gamle. Do Kitungan absuile tanalmadan. Aparmangtan, anin galamle butten Kitungan, anab-bagu-lingan, anin galamlen anindaman butten. Anin edalen danukkan batte, gamle “O hen kani, Hen er lanumdage! Iten asan gamlenden hen mandran er marid usaltaman”. Kun atanalmadan batte, manaridan dele do bo surda tumadgijmar dele.

Tanalmadan a taniytiyan bo murdadage abernanbarij garberan batte, kuddub kanalkalanji a surpidtaben ate, gadlamben a pintunji apingbabe abmele Kitungan amangban, do Kitungan batte bar-maridben asan. Kitungan gamle, “Do GAMANGtungan gameten, Amben berna-Henji amdangba. Bogad amben amang lingan tungmadgij maran dakulenden, Hen anin a d’ong tanalmadan batte Hendam apsuidam-tenai, do ganumten batte anin a d’ong bertai” (Danisam 12:6).

Damascus a tangorban anappai Pol a d’ong tanalmad tiyle Kitungan. Kun a tanalamadan batte raduloge Kitungan a tangor-lingan halen, barij amandrengna-lingan. Atanakudan a mandrengna-lingan, angante anin Rajan a grippan amangban tanangle, kan ambrij tanlamadan dakule anin aboi mananedam-maranna ruangan a tananlamad-lingan (Anappai 26:19).

Kitungan ateng a boantanji gudingle tanalmadan saring. Kitungan Abraam amangban yiraiten tanalmadlingan (Aparamangtan 15:1). Kitungan adgijtadamlen Isak do Jakub amangban (Aparamangtan 26:2, 35:1). Anin gudingle Mojes a d’ong aboi tulaban saring (Hanagod 6:12). Tumadgijmar Balaam amangban absuidamlen (Danisam 24:4). Do Gidion amangban absuidamlen (Bitsara 6:12).

Tanahimdam Kitungan a onagji, amben janang Kitungan a tanalmadan ahangben dete. Amben marid do murdadage tumadgijberlingan adakunaben dete. Ajardina tanalmadan addakulenden, mandranji s’idteji. Kun a dinna-lingan ayengan Kitung absuidamle moloi soaji amangban, nami-janang mangban absuidamte. Anten asan, oskaidamnaban ambendaman Kitungan a tanalmadan a hangben asan.

Okiy Kinolbe absele: “Purban tanalmad lingan dernadage boanta-Namji ad’ong Aman opungle, Hen abo ranapti maran a d’ong sanaiyaman tiylai; mandranji amang saring sedalen abo mandran a d’ong Hen abgugulai” (Sanenken 89:19).