Oct 15 – Langka Baruban Iyeten!

“Anta saring onla maranji gijan gijle Jisun bo langka baruban iyeten” (Mattiu 5:1)

Kitunglen Jisun barijloge gadlamaiten baruban ayirben abmele. Engale sanu maran ambrij, abtangorlangten mukkaban saring. Ogandiba bo onla maranji oskaile daku do baruban a yirben angante Anin gudingtabe. Anin adgamlangne engajanang lanangkaban arduben dete gamle, bindo mukkaban saring abhanale sandulen gamte.

Lanangkaban abdainaben asan, anten asan ruanagan kuddub banangsanji umdrengan umdrengle ordarban yieaiten. D’onglen abdainaben asan Anindaman laggaddamlen. Anin banangge dele d’onglen gamang abmeben asan. Anin boantage dele d’onglen Raja abmeben asan. Anin baruban yireten, kun batte anlen asandungben dete sanelle.

Iten ambrij amandranji yiraiji baruban kun ayam? “Bar onla maranji a d’ong gijan gijle aninji abmele Anin asuyem-daeten, iten asan gamlenden aninji tungdam jaddam deleji, do er gupa mar murkundardanji ambrij barsing gardaige deleji” (Mattiu 9:36).

Nami janang, ateng mandranji daku kan ambrij kudi kota a endungteji ate, iteja sanengsangan er dakkulabe. Aninji adgalameji butte gupa-maran. Iten asan gamlenden aninji adgalamedji a gupa-maran a d’ong, aninji ordaran a d’ong dirdirtenji do ateng ayam royongan tiyteji. Aninji adgalameji Kitungan a itsuman orde orardadage a mandrengna abmele orde aganludeji erahidan a mandrengna.

Tumadgijmar Ejekiel gijle tanalmadan asar jangan barij gamle (Ejekiel 37:1-6). Kan ambrij mandranji daku nami. Aten kanalkalan batte, aninji adirnanji abs’idleji do mandrengna karahidban dakuji. Sattang Kitungan a bernan do Marid Janggardan a ranaptin bargutulte do mandrengnaban urungtai.

Dile mandrengna-ling-ben, erahidan a rajamban arduben abmele daiba, itente Ruangan. Karahidan a sanang surdadam do l’angdam. Kan ambrij a mandrengna buttete mengten aninji kan atangorban galuteji do togi-ganun-lingan. Bindo mandrengna a tangoran sannadam do rakudam asui-mandran sattang abte.

Tanahimdam Kitungan a onagji, Kitunglen Jisun sanle lanangkaban arduben abmele oskainaba, butente a tangoranna, jananrdin do mandrengna. Onla-maranji saring, ansale sedalaben Anindaman batte. Anin sedalaben ayirben abmele Marid do Roitad baruban. Anin bandale gugudagen saring gugudage abmele. Kun saring amben ted po ansanedamaranji saring?!

Okiy Kinolbe absele: “Bar ayengan a mandranji ordaran a durdisol lingan a dimad daku, aninji amang linganji saring atenganji adlznglen dztenji. Dajing mandran er ahidan a mandrengnaban yerteji do dajing mandran ganaroiban do er ahid panudyingban yerteji” (Daniel 12:2).