Oct 14 – Garberan a Barun!

“Antayam lingan ednegoi dele do Anin baruban a garberben asan yereten. Do tampagal Anin Kitungan amang garbereten” (Luk 6:12)

Jisu a mandrengna barij garberan dakule, a bara-lingan kun asan ranaptin batte lumle. Ateng mandranji dakuleji kan ate galamle adraptiadji. Ateng garberana abdainate Janggardadage a mandrengna. Dile ayam royongan atiyben dete, barij tiydamna garberan pangtai Kitungdage a ranaptin. Radu garberan sanaidam baran asusuben abmele do Hanangan asusuben abmang.

Jisun baruban yireten a garbernaben asan; do anson titte U’an Kitungan amangban royongan tiyle. Baru-lingan butteja itjaja adnabmenangle, do amben janang Kitungan atanurdu-lingan dakule arabtite, mandran saring iteja a berna eramdanglabe. Angante garberan sanaisai do barij gamle, baru-lingan agarberan ayamna dingte. Iten asan gamlenden butente baruban yirre garberten, ateng ayam abmele a garberan oskaineten.

Bibol-lingan saring, Jisun a garberan abmele baru-lingan iteja a bara adeben abamang. Kan ambrij, Anin garberle indrang sedae admang mijgal hanangna maranji Anindaman abmele. Kan ate ajardina Anin na Kitungan a O’nan do Anin galamle dile mandranji a j’e-beran. Dile janang, kan ate Anin abmele sanaisaidage dakule baru-lingan agarbernaben abmele, mijgal hanangna maranji a sedaben abmele. Tanahimdam Kitungan a onagji, amben janang oskaidamlen ahanaben dete mandrengnaben abmele, barij garberan a tikki.

Indrang rumang baran lumme abmang baruban iyeten garberne. Bibolan gamte, “Angante baruban saring labsolai, bo surda onla maranji sandungleji” (Mattiu 8:1). Engale Anin labsolai, mutta maran a d’ong jable gameten, “Hen itsumtai samangamte gamle.” Atabdong mutta maran samangle. Anin bo murdea-maran a boantan absamangle a bernan batte. Anin absamangle Pitor akanar a d’ong. Do etigoina rumang baran lumle.

Bibolan gamte, “Bar Onla maranji a d’ong umdrengan umdrengle Anin ansadamle a garberben asan baruban daiyerten. Togalan a delen adnang Anin tetten anson dakuneten” (Mattiu 14:23). Mandranji indrang maine abmang Anin baruban iyeten garberne do Kitungan a ranaptin batte barij dele. Do a tikki baran rumang baranji lumle do mandranji ampara mailen, Anin bar okij baruban dayarle Kitungan a d’ong a senben abmele.

Tanahimdam Kitungan a onagji, Kitungan tanimyiman batte gudingbenten, “a yirben asan”. Er ranaptige Kitungan adnisume a gijben abmele. Iten ahangdrangan angante mandranji a kanalkalanji batte yirtaji bogad aninji er sanamangan batte yirrejiden? Baralingben er dainadage adedong. Kitungan d’ongben gudingte yiraiba gamle, togi do janggardadage aranptin atioyben abmele. Baruban yirba, Kitungan a tanurdu-lingan basuba, do absangdranglen garbernaba. Kun batte Kitungdage aranptin yirtai mangbaben barij gamle bara-lingben.

Okiy Kinolbe absele: “Biyo hen s’i-ling-hen Kitungan a danggun dongsile, a muttibwr lingan tanangtai” (Hanagod 17:9).