Oct 13 – Jito Bwr!

“Bar Anin Jito bwr lingan a golblen adnang hanangna maranji Anin amangban loihle iylai gameji, Kan kuddub angan gadelte? Do daiyarna-Nam bar ordaran a ranatsuman a deroitenan arabmadan iten? Antate opunglen” (Mattiu 24:3)

Jito bwr bo murdadage a barun dakuge Israel abmele, do mandranji barij agalam dakuleji kun a barun abmele. Kan aboi bagu ajar gulji soa feet dakule, do bo mile ambrij barij dakule. Barij baru-lingan Jito neban dakule do kun amanegba abmele sanayamdage dakule. Angante amelgijben abmele kan a baruban, amben barijloge gijle arabtite miholan do Jito jabmolanji.

Jisun dile ayam a garbernaben asan kun baruban yireten. Kotinna Gethsamoni dudin janang dakule. Amben gijle arabtite Jito bwran Jirusalem saring darungyungban daku do sardidyungban saring kun abmele gijtabe. Barij gamle Bethaniban daku, itente darungyungba daku. Kan ate Jito bwran atangorban daku, sattang a hanangna maranji batte arberben dakule. Anlen angante kinoltabe barijloge janardin itente anin oblingle kun Jito bwrban, Mattiu 24, Luk 21 bar Mark 13 lingan.

Jito bwran gadlamlangten Kitungan ayirtaih abmele. Kan aboi Jito bwran, uante saring Kitungan a d’ong anurungan dele ruanganban. Angante Hanangna maranji gijleji, A’dongan anurungan dele, do taruban a d’ongan jale. Atabdong Kitungan a pisirdianji gijtale do hanangna maranji a d’ong ganaman dele, “Bar aninji opungleji, E Galili baiji, iten asan mangban amben g-ijgijle.a tanangte? Mang-ben saring mang desaban ayengan a Jisun . a anurungan dole, Anin ruangban iylen adnang engale amben a gijle, ettegoi na Anin barokij yertai” (Anappai 1:11).

Kritun aboi dirnan batte gutulte. Iten asan gamlenden Kitungan diling karahidan saring, manglinglen janang hanarmengan daku. Engale Kitunglen dilen do Ruanganban daiyerle, anlen dirtenben Anin bar okij daiyartai. Ayirtaih a dinna abmele itjajated bindo Kitungan Jisu Kristun a dayarnan abmele.

Angante Kitungan dayartai, Anin labsotai Jito bwrban. Bibolan gamte, “Bar kun a dinna lingan Jirusalem darungyungsengban, mukkaban a Jito bwran a langka, Anin tanangte. Seletten Jito bwran bagu panalang dete, bar darung-yungseng saring barubyungseng sikkoi ja bo l’ang tamlung bassengan dete. Mittal-bwrate kandrabardisengban do mittal-bwrate jandrumsengban dedten” (Jikoriya 14:4).

Tanahimdam Kitungan a onagji, j’e-ben Jito bwrban apangben dete. Barij sanaisajan batte Kitungan amangban gijgijba! Do oskaidamnaba ambendaman Kitungan a d’ong amainaben asan. Janggardaben, pwrdadaben do d’ongben kun a dinna sikoija anabdusan adedong!

Okiy Kinolbe absele: “Amben baru-Hen a tamlung bassengban aduduge a yerte, iten asan gamlenden barun a tamlung basseng Ajel sikkoi ja yerte. U u, Juda raja Ojiya rajagodeten ayam lingan yurlolen adnang, engale amben aduduge a yerre ettele amben a yerte. Do GAMANG Kitung-hen Anin kuddub marid badloyim maranji ampara aduduge yertai” (Jikoriya 14:5).