Oct 13 – BHARPURER PAVITHRATHA

1 Thessalonika 5:23 Samadhaner Devaj puro pavithar kariye, Thamar Athma,jaan, jeevada,puro apaner Prabhu Yesu Christhu avajana, dosh cheniju jathanethi reda.

Dev dajako heryek varavo achon barobbar racha. Vuj apanen pavithar karan dosh cheniju jathanethi akharithanu rakadevalo cha. Vu Prabhuj apanen puro prathista karan pavithar karevalo cha.

Assal yee jagema apaner vadi Dever khathar kaiven cha? Katho apanen puro pavithar karnu kajakonaj. Vu Prabhu avajana dosh cheniju hubarkadnu kenaj. Jesaruj Pavithar Athmana pavithar karenaj yek yekena Dev demelocha.

Romavalun 15:15 Mar bhayiyo,paral jann kajako bhokan Pavithar Athmathi pavithar venaj demloch Kan vanchacha. Pavithar Athmar kam Pavithar kareraj Kan yee vachanema dekacha.

Pavithar Athmar agediyar Kam kaikatho papen kanaken voma dosh cheniju paper joremathi chodayeroj. Aposthal Pethru Pavithar Athmar jorethi bodh kidojana samlejako jann dall phutan Abba ham papethi chodayena kai karnu Kan puche. Yohan 16:8 Pavithar Athma athanu,  paper vadin, niyathether vadin,nevervadi jagathina kalavaju karacha.

Pavithar Athma karero Deemo Kam vimochan pamelejena papepar jayam devacha. Aposthaler Kam 1:8 vachanema yee Pavithar Athma thamapar avajana tham jor palocho Kan Prabhu apanen bachan demelocha. Vorsaruj apan rakadajako sejini bhandnaken jayam palerecha.

Pavithar Athma karero theenmo Kam thar jeevanema joren laandacha. Dever seva karenan,vyarir hathemathi athmavun chodayena jor dacha. Pathaler darvajan burnaken sabhavun bhandena Ajji Dever krupathi hach kam karena apan jorer palidecha.

Pavithar Athma karero charmo Kam apanerema vassan, Dever swabhavan laan den,pavithrathama barobbar karacha.1 Corinthivalun 3:16 vachanema Mar Premevalavo thar jeevada Pavithar Athma vassajako Deval kan malam chenika? Yeej Pavithar Athma tharema vassan tho thona rupanthar anubhavama dadi chalavacha.

Ajji jada dhyan karen pado  2 Corinthivalun 3:18 Apan sey vagado mundethi Dever mahimana kanchema dekaju dekan, Athmar Prabhuthi vu sayaama mahimapar mahima palen rup badaljaya.