Oct 09 – Awrloge a Mandrengnan!

“Yante gamle aninji mandrengnan rapti hangteji, do awrdage antate rapti hangteji, kun asan Hen yerrai” (Jon 10:10)

Israel a darakuna, bo jale barun dakule aboi Samaria gamleji aboi Samarian a barun (Anappai 17:25). Kan a barun-lingan, ateng tulaban do nebanji j’onji dakule, do janang ateng. Do kan batte d’onglen dongrabte dile mihnum-lingan (Aparamangtan 2:7).

Karmel’ gamlenden ‘Gudangan, Karmel a barun-lingan kan ate, radu tumadgijmaranji gamlenden Eliya do Elisaya basuleji. Barun a langka-lingan tumadgij-maranji a ischoolan dakule. U’u, Karmel adarakuna tumadgijmaranji abmele, do Kitungan kun adarakunaban dakule. Rajan Ahab ayamling, angante barij pwrpwrlingan dakule adukkarin batte Jijebel, Kitungan adsaiad kun abmele. Anten asan, anin badrijle anumengan a Janggardan Eliya amangban, diandilen baal a tumagij-maranji a d’ong abs’idben asan. Kitungan janang anumengdage ayengan amandranji amangban kan ambrij lumteji.

Bogad amben Kitungan abmele adilinganden, Anin tiytaben ganugudage Karmel a Barun. Karmel aboi ganadlaman dele Janggardan atanijtiyan, do  Janggardan a J’on. Anlen hangtabe hangdrangan Marid Janggardan saring. Kun amanengban anamna do garberan maidamlen Janggardan a taniytiyan. Bindo aninji Janggardan a j’on, aninji bigardanji abmele aboi kanalkal ambrij dele.

Ajardinna anabsittana. Anten asan, amben sanaisai Janggardadage a J’on bar Janggarda a taniyatiyan. Janggardan a banandan baran. Uantejanang Janggardan a taniyan, Kitungdage a baran tiylangten mandrengna-lingan. Tinji Janggardadage a taniytiyan anidolan dele. Dile Janggardan a j’on do rabangtabe Kitungan Jisun, manglinglen saring!

Papwr Anosaij-lingan, angante Kitungan bailangten baranaben asan buya-marge engale aboi lamna jaban dakute kun ambrij, do engale ranan abmainate yaryarmanengban. ‘Bell’ Janggardan ataniytiyan gadlamte do ‘J’on’ objongte Janggardadage a j’on. Nami a dinna-linganji,

Kitungan d’onglen murda buyan abmelai. Anten asan, bagu ataniytiyan do Janggardadage a j’on mandrengna-ling-ben gijtaben dete! Bibolan gamte Karmel a barun batte Kitungan m’oihten. “E GAMANGtung, Aman a sedalen a maranda-namji a dong danonsidang-Nam batte bo gupa mar dea. Aninji anson rzngrzng tulab lingan, tarunggal desan a tarangdi lingan basuteji. Tanahimdam Kitungan a onagji, Kitungan awrloge absittabente Janggardadage do Ordardage a mandrengna saring!

Okiy Kinolbe absele: “Kuni a Kristun abmele anlen a oblengtai, do barij banuddin batte dile mandran a d’ong abkilkiltai do dile mandran a d’ong a hanghangtai, yante gamle Kitungan amangban Kristu lingan hadabloge, gamle dile mandran a d’ong anlen rapti a tabnangtai” (Kolossi 1:28=).