Oct 02 – Hadab Anabruyzman!

“Iten asan gamlenden Hen manangga maran a pwrardan abruyzmtai bar dile danukka-j’e maran a d’ong babyetai” (Jirimiya 31:25)

Sodom Gamora Kitungan anabsidan. Do Kitungan ogandile Lot a d’ong abluben; ayengan amandran dirnadage dakule, do a birindan endrang abs’zden abmang Sodom. Bindo aninji aumdrengben apsele adnisumadeji Sodom do abdingdinglenji. Sodom abs’zdben yiraiten, omdile kun ayam sikoija, a dukkarin, do bagu adangardionanji hamle orungle, do aninji garda abayiraban yirlaji, Bibolan gamte.

Ednegoi aninji a d’ong amdungle urunglenji a tiki aninji amang saring Lot a d’ong bo mandra opungle gameten, Pwrardan a ranabraban asan yerba, daiyargudlen a gijdong do kan a kuddub basseng lingan a dakudongne. Baruban yerba, ijjaden s’zdtaben.

Amben ranabraban ayangte baruban. Kun a darakubanna bo lanangkadam do  barijranapti a lumun daku. Nami janang, Kitungan d’ongben gudingte do abrihnaba baruban’ (Sanenken 23:5). Nami, barun aboi Kaloborin abarun, Kitunglen Jisun pintulen asan oante anabdaijan dele (Episi 1:23).

Do kubdamneten engale ameng kanuban ambrij. Anten asan amben Kitungan atanurdu-lingan daku, do bo bangsa amihaman batte. Anten asan amben tanamadan ahangle piton saring do anablun aman’oihan (Jon 2:7). Bar kun na ate asusunan maridben. Kitungan angaja adkaridae butente amangban yirtaiji, Kalobori a baruban ban. Anin tanimyiman batte gudinglaben: “E manangga do lanagin maranji. Kuddub-ben mangba-Hen yeraiba, do Hen ablulunataben”.

Buteja pintun saring tanamadan adtiye, Kristun amihaman sadan saddle. Anblunja, butenja ahiman agasa ruangan ajaitan anblun atiyben abmele. Anten asan, Golgotaban yerba do Kalobori a baru egijba. Kristun Jisun a d’ong gijgijba, butente a d’ong tanangan dele, idba ranubaban batte, barij a d’ongan tanudan batte, gojalan batte ntangleji kalobori-lingan.

Bibolan gamte: “Bute bute Anin amangban gijgijleji aninji tan’aran deleji; aninji a mukkan angaja ganaroijan adde-e”. Angaja abasudong basseng lingan itente gadlamte lulunan, lulunan do asuyeman bo bangsa mandrengna-lingan.

Tanahimdam Kitungan a onagji, j’eben asaiben dete Kaloborin a barun kun ambrij anabs’zdan yirtai.

Okiy Kinolbe absele: “A jardin na GAMANGtungan Anin a mandradamanji a d’ong timyimle, do Anin a kuddub badloyim maranji Anin a s’i lingan dakuji. Aninji kuddubanji Anin a j’engban turdumleji do Anin amang saring hanangan hangteji” (Bagujuanaber 33:3)