Oct 01 – Ararat a Barun!

“Engdasingan Ararat a barun a langkan tangidle” (Aparamangtan 8:4)

Engdasing lingan Noa urungle a birindaji barij d’an a dakule ayam-ling do langkaban tangidle order lingan. Bar a tanakud-lingan Ararat a baruban tanangle. ‘Ararat’ agaramgaman Marid darakuna. Bo bangsa barun, do Armenia lingan daku. Gulji ajar feet dakuleja, bo bangsa jandrumanji dakule kun amanengba.

Noa a bungsang langkaban saring lanangkaban anabdin dele ganuran batte. Angante Marid Janggardan a ganuran yirtai mangbaben, amben janang ardute lanangkaban, kun ate amben galamle adrabtie.

Noa a bungsang-lingan sanalaihan abmele do ingin janangan adakuad, bar mandran batte janang sanalaihan adea, mandran a Banudin. Kudi-kota apangben adead. Do dile ayite adnang, ganuran batte. Bindo kun bungsangan anabdin dele Noa do a birindan langkaban saring lanangkaban, atanakud-lingan kun bungsangan tanangle Ararat a baruban. Amben ja, angante amben barijloge asurpiddamten Marid Janggardan batte anabtangoran debenten, Jangardadage mandrengnaben sanusun dete barij ganung-lingan, barij ganungda-lingan, do jaru d’a-lingan nami amben a engdate. Do Marid Janggardan barij lanangkaban urungtaben Janggardadage mandrengna-lingan.

Ruangan a banuddin ranin delen do anabpaihan dele Noa ayam-ling. Kun ambrij, Marid Janggardan ajanababan barij desa-lingan barij anabpaihan dete, Kitungan indrang yiraihan abmang. Anten asan, “Amben tanakudan a ganuran ayaman apsele a ganuran Gamangtungan a d’ong garba” (Jikoriya 10:1). Kitungan janang susule: “Bar kun a tiki Hen kuddub mandranji a lanangka Janggarda-Hen lale tiytai” (Joel 2:28).

Nami Marid Janggardan a ganuran dile darakunaban ardutai, kan ate aboi Janggardan a baran. Kanina ate lanangkaban bungsangan abmele, Kitungan a ranukkunji anabdin dete ruanganban. Amben janang anabdin debenten lanangkan saring lanangkaban; Ararat abarubanted bindo Kitungdage arengan, Kristu Jisun. Angante panedpedan dete, Marid Janggardan ruangan a kukkuran, anabhanan dete Jisun Kristun a ranukun sidrung-maran batte.

Noa ayamling, bakurdi dinna sikoija ganurle. Bakurdin’ gamlenden banidsaran. Bakurdin banitsara anidolan dele Bibol-lingan. Angante Jona Ninevi gardaban bangsa anoblingan aoblingben yireten, bakurdi dinna sikoija hanangan tiyle do abadyarj’etenji Kitungan amangban, do aninji adyarj’elinji Kitungan amangban.

Tanahimdam Kitungan a onagji, amben janang taniyan dele asuyeman a dinna. Bungsangan asanan aningadan dete, atanakudan. Anten asan, abriynaba Kitungan Jisun a bungsangba, erabdingdinglingbe.

Okiy Kinolbe absele: “Ednegoi tanakud ayam lingan GAMANGtungan dete do, sarebasingan a barun kuddub barunji saring jznjzn langka baru lingan tanabngijan dete, do antate sanna barunji saring anablangkan dete. Bar tetten kuddub jattinji dungdamdage yertaiji” (jiksaiya 2:2).