Nov 27 – GERUA TOK GEHRA!

Ezekeil 47:3 “tai anishe ami ke pani pora; pani tu ahishe ami laga gerua tok”.

Ezekeil 47 tu ekta parth ase juntu dikhai gehra atmakarik rahasya khan. Itu parth te, apuni pabo Pobitro Atma ke ekta nadi nishina, aru barhi thaka aru gehra anubhav khan Isor laga bacha khan ke.

Poila anubhav juntu Pobitro Atma diye, utu gerua tok anubhav ase. Bhabna koribi ki ekta manu berai ase rasta te gorom suraj te; achanak pai ekta nadi ke. Tai achanak hi polai nadi te aru rakhe tai laga theng ke pani te. Juntu homoi tai utu kore, gorom tu name aru tai taza hoi thanda pani logote nadi laga. Sob dukh khan tai laga theng laga jai aru tai ahram pai. Utu pani ane dangor anondo aru khushi tai laga mon te.

Ami ekta biswasi ke jane. Tate ekta bishi sundor nadi matha thakishe tai laga kaam kora jaga usorte. Tai utu nadi te jai hodai 4baji phujirte gau dhulabole. Thanda din khan te, pani tu bishi thanda thake bordasht koribole. Hoilebi tai age jai aru pani te ghuse. Tai koishe ki tai annbasha kobole shuru hoi jitya tai rakhe tai laga theng ke borop pani te.

Apuni laga mon anondo te thake jitya apuni bhorta hoi Pobitro Atma pora. Sob prithibi laga digdar khan, bhagor khan aru dukh khan hati jai ekbaar pora aru apuni shuru hoi anondo koribole Isor te. Gerua tok pani laga anubhav khushi pai mon laga Pobitro Atma pora.

Bacha khan samundar kinarte jabole khushi pai berabo nimite tai khan laga ama baba logote. Ekbar tai khan samundar usorte jaile, icha kun bacha hoilebi polabole utu pani te hi ase aru khara koribole leher khan te. Tai khan polai kina rte jitya leher ahe baharte aru jitya leher tu jai, tai khan wapas jai gerua tok pani pabole. Itu pora diye dangor khushi tai khan ke; tai khan laga ama baba khan bi sai kene khushi pai.

Jitya apuni pai chuni loa Pobitro Atma,isor laga morom dhale apuni laga mon te (Romans 5:5). Aru apuni bhorta hoi dangor khushi logote. Utu swarg nishina nadi laga pura bhorta kore apuni ke swarg laga anondo te. Isor laga bacha khan, icha kore gehra atmakarit anubhav nimite. Khara koribi ekta gehra aru niji rishta Pobitro Atma logote.

Aji bhabna koribole laga pobitro kotha tu hoile John 7:38-39 “tai jun biswas kore Ami ke, jinika Pobitro kotha te koi kene ase, tai laga mon pora bahi bo jinda pani.” Hoilebi itu Tai koishe bhabna kori kene Atma ke, jun biswas kore Tai ke tai pabo.”